ANQARA - Sekretera Cinîyan ê KESKî Done Gevher, bernameyê çalakîyanê xo yê hewteyî yê çarçeweya 25ê teşrîna peyêne de eşkera kerd û va, “Sey cinî, ma waştişê xo yê cuya pîya yê mîyanê aştîyê de welatêk demokratîk de israr kenê.”

 

Konfederasyonê Sendîkayanê Karkerê Pêroyî (KESK) bernameyê çalakîyanê xo yê 25ê teşrîna peyêne, Roja Têkoşînê Hemverê Şîdetê Cinîyan ê Mîyanneteweyî, bi kombîyayîşêk çapemenî ke awanîya Sendîkaya Karmendê Pêroyî yê Şubeyê Xizmetê Ramitişî û Daristanî de ame kerdiş, eşkera kerd. Sekretera Cinîyan a KESKî Done Gevher va, “Ma bi qerar ê ke semedê cuya bêşîdetî, têduşt û azadî têkoşîn bikerê” û tut û cinîyê karkerê ke şewatê fabrîqayê parfûmî yê Dîlovasi de vejîya de dinyaya xo bedelnabî zî yad kerd. 

 

Done Gevher, dîyar kerd ke şewat yew netîceyê polîtîkayanê hukmatî yo ke komelê goreyê hewcedarîyê sermayeyî newe ra awan keno û keda erjan û bêasayîş domnêno û va, “Ma hemverê nê rijnayîşî de yê. Ma waştişê vurnayîşê nê sîstemî, biqedîyayîşê keda bêasayîş û nêqeydkerde ke beno sebebê merdişê cayê karî û hesabperskerdişê heme berpirsîyaran kenê.”

 

Mîtîng do bêro viraştiş

 

Done Gevher bernameyê ke KESK do hewteyê 25ê Teşrîna Peyêne de bajarê cîyayan organîze bikero ser o va: “Ma do dewaya ke kerdoxê desteştişî taqîb bikerê. Ma do waştişê xo yê edaletî semedê Rojîn Kabaîşe û heme cinîyê ke rastê şîdet yenê, dewam bikerê. Ma do 24ê teşrîna peyêne de kartan hevalanê xo yê tepiştiyan rê bişirawê û mîyanê hewteyî de eşkerayî û pêvînayîşan hemverê bêasayîş û şîdetê camêrdî de organîze bikerê. Ma do 25ê Teşrîna Peyêne de zî heme bajarande  platformanê cinîyan dir hemverê şer, şîdet û feqîrî wareyan de bê. Ma do 28ê kanûnê de zî semedê mîtîngê Cinîyan ke ma do Anqara de virazê, şîdetê camêrdî yê kede, beden û sîstemê kolonyalî rê vajê nê.”