Elfazî Toral

 

STENBOL - Tepişteyê cinîyê ke zîndanê Tirkîya de yê, pêwa heme zordarî û tecrîdî berardişê kultur û hunerî ra fek ci ra veranêdanê. Resimê ke cinîyan zîndan de viraştî do 22-23ê aşme de bêrê mojnayîş.

 

Tepişteyê cinîyê ke zîndanê Tirkîya de yê heme hetan de berardişê çand û hunerî kenê cuye. Resimê ke tepişteyê cinîyan viraştê do bi nawitgehêk bêrê mojnayîş. Tepişteyî pêwa heme zor û zehmetîyan nê berardişanê xo amade kenê û sey nîşaneyê xoverdayîşî bale ancenê. Armancê organîzasyonî o yo ke hêzê hunerî yê bi piştîdayîş û xoverdayîş ameyê têhet, komelî rê bêro eşkerakerdiş.

 

Komeleya Hetkarîya Keyeyê Tepişteyan ê Marmarayî (MATUHAYDER) bi şîarê “Hunerê xoverdayîşê ma” bi nameyê “Nawitgehê Rihê Cinîyan ke Zîndan de Sînor Nêzanê” virazeno. Nawitgeh 22-23ê teşrîna peyêne de Merkezê Kulturê Mezopotamyayî (NÇM) do bêro akerdiş.

 

MATUHAYDER’î ra Nurten Karagoz derheqê babete de qisey kerd.

 

‘Pêwa sînorkerdişî berardişî ra fek veranêdanê’

 

Nurten Karagoz da zanayîş ke zîndan de tecrîdêk pîl babeta qiseykerdişî ya û va tepişteyî bi xeylê binpaykerdişê heqan dir yenê rî bi rî. Nurten Karagoz wina ard ziwan:

 

“Zîndan de berardiş sînordar o. Labelê pêwa nê tepişteyî berardiş ra û xoverdayîş ra fek veranêdanê. Xê rê rayîrêk vînenê. Îmkan virazenê. Resnenê teber. Ma do nawitgehêk  zîndanê ameyan akerê.”

 

Hêzê xoverdayîşî

 

Nurten Karagoz dîyar kerd ke bi nê nawitgehî wazenê hêzê awankerdişî bimojnê û nê şertan de çi eşkeno bêro kerdiş nîşan bidê û wina va: “Bi armancê piştîdayîşê cinîyê tepişteyan ma na xebate muhîm vînenê. Ma sey MATUHAYDER nêeşkayîne nêvînaye bidîne. Ganî rayapêroyî nê bizano. Tepişteyî pêwa heme bêîmkanan hêzê xoverdayîşî mojnenê. Huner hacetê xoverdayîşî yo. Ganî heme kesî wayîrê xesasîyetî bê û nê nawitgehî rê serdayîş bikerê û tepişteyê cinîyan dir piştîdayîşê xo nîşan bidê.”

 

‘Nê resimî rihê zîndanî yê’

 

Nurten Karagoz wina peynî ard: “Resimê ke zîndan ra ameyê rihê zîndanî yê. Ganî heme kesî hemverê nê de xesas bibê. Ganî heme tepişteyî lezkî bêrê veradayîş û biresê azadîya xo. Ganî teber de berardiş bikerê. Ma wazenê nawitgehê bînî înan dir bikerê. Hêvîya ma a ya ke tepişteyî pêro vejîyê û ma dir bê, muzîk, edebîyat, sînema û huner teber de bikerê.”