MERKEZÊ XEBERAN - Rayberê Şarê Kurdî Abdullah Ocalan vernîya 25ê Teşrîna Peyêne de mesajêk şirawt cinîyan rê û va:

 

“Tu hemleyê azadîya komelî yê ke azadîya cinîyan nêkerê merkezê xo, nêeşkenê bibê şorişêk raşt.”

 

Rayberê Şarê Kurdî Abdullah Ocalan, bi wesîleya 25ê Teşrîna Peyêne Roja Têkoşînê Hemverê Şîdetê Cinîyan ê Mîyanneteweyî, mesajêk şirawit.

 

Mesajê Abdullah Ocalanî yê 25ê Teşrîna Peyêne wina yo:

 

“Komel awanîyêka sinife ya yew tebeqeyêk nîyo, komel wareyêko têkoşînî yo, bingehê cinsî, tarîxî yo û xeylê tebeqeyan ra pê yeno. Problemê destpêkî û yê tewr girdî yê merdimîye şorişê verpayê ci ke bi koletîya cinîyan dest pêkerdo û hêriş komelkîbîyayîşê ke dorê cinîyan ser o awan bîyo. Şîdetê keyeyî de, kiştişê cinîyan, zordarîyê pederşahî ke heta nika est o, heme zî nîşan û dewamê nê hêrişê tarîxî yê. Awanîya kastî ke hêriş berd ser komunalîteyî û komelkîbîyayîşê dorê cinîyan, dima ra Mezopotamya de vurîya meclîsê îlahîyan, rahîbanê Sûmeran û tîya zî vurîya fîrewn û qiralan, bi nê rengî zordarîyê pederşahî yê komelî ser o daîmî kerd.

 

Nê serdemî de cinî madeyê xam yê tewr qîymetdar ê kapîtalîzmî yê. Bedena ci yeno rotiş, şexsê ci yeno pêşkêşkerdişê bazarî. Cinîya ke ruhê ci hetê camêrdî ra zî ame îşxalkerdiş, bi nê xençerê koletîye vera ke mezgê pederşahî dayo paşte aye ro. Hîyerarşîyê komelkî yê bi hakimîyê camêrdî ke hetê şerê şaristanîyê hezar serran ra ame awankerdiş, şîdet û şer bi xo ra ano. Şaristanîya camêrdî ya bi dewlete ziwan, berardiş, bedena cinîyan, dima ra zî komel înan ra girewt. Heta ke no heqîqet nêro dîyayîş semedê azadîye gamî nêeşkenê bêrê eştiş.

 

Rewşa bi problemê ya ke sîstemê bi hakimîyê camêrdî kerdo mîyanê cinîyan ganî bêro fahmkerdiş û çareserkerdiş. Wexto ke merdim kiştişê cinîyan, şîdetê keyeyî de, şîdetê cinîyan ser, kolonîyê semedê cîyakerîyê cinsî bîyarê verê çimanê xo, wina sewîyeya koletîye texmînan ra zêdeyêr gird û berz a. Cinî bi temamî ameya vistiş. Heqîqetê ci ameyo qelibnayîş. Ê xirxalê ke cinî semedê xeml û rewşe kenê xo ra, ê xizêmê ke kenê zinca xo, heme zî nîşaneyê koletî yê ke tarîx û heta nika ameyê. Modernîteya kapîtalîstî de koletîya cinîyan hîna kûr bîya, sîstem cinî vurnayo hacetê bazar û xemlî. Semedê xelasîya nê koletîya bi rêk û pêk, semedê azadîya lazimî bi kûrbîyayîşêko gird û rêxistinbîyayîşêko xurt est o.

 

Tu hemleyê azadîya komelkî, heta ke azadîya cinîyan nêkero esasê xo nêeşkeno bibo şorişêko raşt. Têkilîyê mabêne cinî û camêrdan de zaf tehlukeyîn vînena. Ma azadîya cinîyan xo rê kerde esas û bi nê rengî têkilîyan ercnayî. Beşo tewr gird ê karê ma, karê cinîyan o. Muhîm o ke têkilî û nakokîya mabêne cinî û camêrdan de bêro fahmkerdiş. Ma hakimîyê camêrdî ke azadîya cinîyan asteng keno û cinîyan bi her tewirî keno kole analîz kerd, ercna. Ma sosyolojîya azadîye awan kerde. Eşkera yo ke cinîbîyayîş zehmet o, xelasbîyayîş zî asan nîyo labelê ganî cinî no bi cesaret bikero. Semedo ke xençerê hakimîyê camêrdî ke ginayo paşta merdimîye ro bêro vetiş û cuya azad û demokratîk bêro awankerdiş, ganî serkêşîye bikero.

 

Abdullah Ocalan”