AMED – Şero ke bi serran o Rojhelatê Mîyanên yeno domnayene, şarê kurdî hedef gêno. Endama DBP’yî Rêzan Zugurlî va: “Şarê kurdî her tim hîn xurt û yewgirewte benê; ê do pîya cewabê nê şerî bidê.”

 

Tesîrê şerê Rojhelatê Mîyanên ke bi serran o dewam keno, şarê herêmî ser o hîna zî tehlukeyêk pîl o. Nika şîdet û destveradayîşê leşkerî netîceyê cidî, bi taybetî herêmanê kurdan awan kenê. Na rewşe eynî wextî de lazimîya piştîdayîşî mabêne cimatê herêmî de mojnenan. Şer tenya bi pêrodayîşê herêmî sînordar nîyo, labelê tesîrê xo awanîya kultur û cimatî yê cimatan ser o zî keno. No şer û pêrodayîş tenya bi Tirkîya û Sûriye sînordar nîyo, labelê rasterast tesîrê herêmê kurdan ê ke sînorê Îranî ser o yê zî keno û îstîqrarê herêmî tehdît keno.

 

Endama Meclîsê Cinîyan a Partîya Herêmanê Demokratîkan (DBP) Rêzan Zugurlî derheqê babete de qisey kerd.

 

Rêzan Zugurlî ard ziwan ke bi serran o hêrişêk bêmabêne Rojhelatê Mîyanên de dest pêkerdo û heta roja ewro zî dewam keno. Rêzan Zugurlî destnîşan kerd ke Rojhelatê Mîyanên bi taybetî şerêko taybet yeno domnayene û va ke no şer heme şarê kurdî ser o yeno domnayene. Rêzan Zugurlî wina dewam kerd: “No ewil Rojawan de dest pêkerd, dima ra Rojhelatê Mîyanên vila bî û her wina hêriş Başûrê Kurdistanî ser o zî est o. Heme şer û polîtîkayê lêşinî şarê kurdî ser o yenê domnayene. No zî semedê berjewendîyê dewletê nîjadperest û serdest o. Semedê binpaykerdişê şarê kurdî no yeno kerdiş, her wina destkewtişê şarê kurdkî ke bidest kerdê, wazenê çin bikerê. Labelê şarê kurdî her tim zêde hêzêr û xurt o. Şarê kurdî do cewabê pîlan bido nê prosesî zî. No cewabdayîş zî bi yewîya kurdan yeno.”

 

‘Bi Peymana Lozanî Kurdistan kerdî çar perçe’

 

Rêzan Zugurlî bale ant ser Peymana Lozanî û va ke bi nê peymane Kurdistan kerdî çar perçe û ewro zî wazenê nê bidominê. Rêzan Zugurlî va: “Bi Peymana Lozanî demo Kurdistan kerdî çar perçe, ewro zî wazenê nê bidominê. Şarê kurd nê prosesî ra netîceyê muhîmî vetî. Birêz Abdullah Ocalan tenya semedê şarê kurdî nê semedê pêro şarê Tirkîya şexsîyetêk muhîm o û heme şarê dinya zî nê vînenê. Birêz Ocalan şerê taybetî ke yenê domnayene xeylêk rey ercnayîş kerd û vatişê ey ewro heme vejênê orte. Şerê Rojhelatê Mîyanên ser o zî şarê kurdî ser o yenê domnayene. Wazenê kurdan reyna perçe bikerê û înan yewbînan ra bivisnê. Demo hêriş Rojawanî rê ame kerdiş heme şarê kurdî bîyî yew. Şarê kurdî ameyî têhet û bi her hawayî yewbînan girewtî. Nika Rojhelatê Mîyanên de zî no şer dewam keno û şarê kurd hemverê nê şerî zî do bêrê têhet. Bi her hawayî do wayîrê kultur, ziwan vejîyê.”

 

‘Yewîya şaran yewîya cinîyan ra derbas bena’

 

Rêzan Zugurlî dergîyê qiseykerdişê xo de wina va: “Vengdayîşê ma oyo ke şarê kurdî yewîya xo bi serkêşîya cinîyan vejê orte. No zî bi serkêşîya cinîyan eşkeno pê bêro. Şarê kurdî semedê cewab bidê îqtîdaran ganî heme bêrê têhet. No zî bi serkêşîya kurdan bêro bicaardiş. Nê semedî ra no têkoşîno ke yeno domnayene ma do bidominê. Vengdayîşê ma heme şarê kurdî û dinya rê yo; bi taybetî şarê kurd û dima ra heme şarê bînî ra ke bi yewîye bêrê têhet. Dewletê ke hêrişê ma kenê hêrişê heme şaran kenê. Ma bi yewîya xo hêrişê Rojhelatê Mîyanên bidê vindarnayîş. Yewîya şaran, yewîya cinîyan ra derbas bena.”