MERKEZÊ XEBERAN - HRANA'yî neql kerd ke Îran û Rojhelatê Kurdistanî mîyanê 24 saetê peyîn de hêrişan de 17 sivîlan dinyaya xo bedelnayî, 8 kesî zî birîndar bîyî.

 

Ajansê Xeberan ê Aktîvîstanê Heqê Merdiman (HRANA) derheqê hêrişê 24 saetê peyîn yê semedê şerê Îsraîl-Dewletê Yewbîyaye yê Emerîka (DYE) û Îranî raporêk weşan kerd.

 

Nê gore 18 bajaranê Rojhelatê Kurdistanî û Îran de nêzdîyê 360 hêrişî pê ameyî. 35 baregehê leşkerî, baregehê Supayê Pasdaran, merkezê hêzê Besîc, teyaregehê leşkerî, merkezê polîsan, depoyê neftî û cêrxanê enerjiyê atomî yê Îranî ameyî hedefgirewtiş.

 

Ame neqlkerdiş ke netîceya hêrişan de 17 sivîlan dinyaya xo bedelnayî û 8 sivîlî zî birîndar bî. Ame dîyarkerdiş ke tewr zêde hêrişî Tehran, Esfehan, Elborz, Hurmizgan, Fars û Mazenderan pê ameyî.

 

Goreyê dayeyê nêfermî, destpêkê şerê mabêne Îsraîl-DYE û Îranî ke 28ê Sibata 2026ine de dest pêkerdê ra heta vizêrî hezar û 568 sivîlan dinyaya xo bedelnayî. Nînan ra 236 ci emrê înan binê 18 serrî de bî.