STENBOL - Derheqê rojnamegere Esra Solîn Dal û Mehmet Aslan de qerarê beraetî ame dayîş û rojnameger Erdogan Alayamutî rê zî bi sebebê “propagandaya rêxistinê kerdo” yew serrî û 3 aşmî ceza ame birnayîş.

 

Derheqê muxabiranê Ajansê Mezopotamyayî (MA) Esra Solîn Dal û Mehmet Aslan û rojnameger Erdogan Alayumat de bi sebebê “Endambîyayîşê rêxistine” dewa ameybî akerdiş. Roniştişê şeşine ê dewa Edlîyeyê Stenbolî yê Çaglayanî de ame organîzekerdiş.

 

Ronîştişê pancine de dozgerîye semedê xeberanê ke rojnamegeran amade kerdî sey suc hesibnayî û bi sebebê “endambîyayîşê rêxistine” waştibî ke rojnamegerî bêrê cezakerdiş.

 

Ronîştişê 7ine yê dewa Dadgeha Cezaya Girane ya 25ine Stenbolî de ame organîzekerdiş. Avûkatanê rojnamegeran roniştiş de amade bîyî. Her hîrê rojnamegerî tewrê ronîştişî nêbîyî.

 

Endamî û îdarekarê Komeleya Huqûqî û Xebatanê Medyayî (MLSA) û Komeleya Huqûqnasanê Semedê Azadîye (OHD) roniştişî taqîb kerdî.

 

‘Semedê faalîyetanê rojnamegerîye dewa ameye akerdiş’

 

Ronîştiş bi pawitişê avûkatan dest pêkerd. Avûkatan dîyar kerdî ke Esra Solîn Dal û Mehmet Aslan û Erdogan Alayumat rojnamegerîye kenê û vatî: “Semedê xeberanê tecrîdê Birêz Abdullah Ocalanî ser o viraştî dewa ameye akerdiş. Hîn xeberanê ke dosya de est ê tena çekuya ‘Abdullah Ocalan’ est a. Semedê faalîyetanê rojnamegerîye dewa ameye akerdiş, ma tehliyeyê muwekîlanê xo wazenê.”

 

Heyetê dadgehe dima ra mabêne da roniştiş û dima ra qerarê xo eşkera kerd. Dadgehe derheqê Esra Solîn Dal û Mehmet Aslan de qerarê beraetî da û rojnameger Erdogan Alayamût rê zî yew serrî û 3 aşmî cezaya hepsî birna. Dadgehe cezakerdişê semedê Erdigan Alayumatî taloq kerd.