AMED - Cinîyê ke tewrê Mîtîngê Azadîye yê Amedî bî, bi sloganê “Bi Rayberê Azad Ver bi Cimatê Demokratîk”, dîyar kerdî ke azadîya fîzîkî ya Rayberê Şarê Kurdî Abdullah Ocalanî dir do şer û krîzê Rojhelatê Mîyanênî zî peynî bibê.

 

Bi serkêşîya Têgêrayîşê Cinîyanê Azadan (TJA), Partîya Herêmanê Demokratîkî (DBP) û Partîya Têduştî û Demokrasîyê Şaran (DEM Partî) bi sloganê “Bi Rayberê Azad Ver bi Cimatê Demokratîk” 28ê hezîrane de Meydanê Îstasyonî yê Amedî de Mîtîngê Azadîye ame organîzekerdiş. Bi hezaran kesê ke meydan de ameyî têhet, sloganê “Bijî Serok Apo” berz kerdî. Meydan de zerrîya şarî bî yew û waştişê azadîya fîzîkî ya Rayberê Şarê Kurdî Abdullah Ocalanî kerdî.

 

Mîtîng de, derheqê azadîya fîzîkî ya Abdullah Ocalanî ke 27 serrî yo Girawa Îmralîye de tepişte yo, ma mîkrofon cinîyan rê derg kerd.

 

‘Mîmarê prosesî Abdullah Ocalan o’

 

Cinîyan ard ziwan ke Şarê Kurdî bi serran o têkoşînê azadîye domneno û vatî ke semedê çareserîyêka manedar Abdullah Ocalan her wext girawe ra rayîranê çareserîye pêşkêş keno. Cinîyan bale ant Prosesê Aştî û Cimatê Demokratîkî û vatî mîmarê nê prosesî Abdullah Ocalan o. Cinîyan dîyar kerdî ke semedê azadî û aştîyêka manadar lazim o azadîya fîzîkî ya Abdullah Ocalanî pê bêro û vatî, “Heta ke Serekê ma azad nêbo ma sey Şarê Kurdî zî azad nêbenê.”

 

Cinîyan dîyar kerd ke çareserîya şer û krîzê Rojhelatê Mîyanênî azadîya fîzîkî ya Abdullah Ocalan dir mumkin a.

 

‘Gamê somutî çin ê’

 

Cinîyan bale ant rêziknameyê qanûnî yê ke Prosesê Aştî û Cimatê Demokratîkî dir girêdayeyê û dîyar kerdî ke lazim o dewlete gamanê zerrî ra bierzo. Cinîyan dîyar kerdî proseso ke nêzdîyê di serran o dest pêkerdo û va ke hetê şarê kurdî ra gamê lazimî ameyî eştiş, la pêwa nê hetê îqtîdarî ra hema zî gamê somutî nêameyê eştiş.