AMED - Hemverfeka Komîsyonê Huqûqî ya DEM Partî avûkate Sevda Çelîk Ozbîngole derheqê konferansê Huqûqnasan ê Kurdan ê Demokratîke de wina vat: "Faliyetê xo yê tîya ra tepîya zî ma hewldanê ke heme binyatanê xo zemînê faliyetê awankerdişê yewbîyayîşê demokratîke de bîyarê pê."

 

Amed de konferansê Huqûqnasanê Kurdan ê Demokratîke bi sloganê "Semedê Azadî, Statu û Aştîya Huqûqê Demokratîke" ame viraştiş û di rojî dewam kerd. Konferans hetê Komeleya Hiqûqnasanê Semedê Azadîye (OHD) ra ame rayra berdene. Konferans de serekê baroyanê bajaranê Bakurê Kurdistanî, îdarekarê saziyanê huqûq û heqanê merdiman, zaf avûkatî û sewbîna zî îdarekarê DEM Partî yê huqûqnasî amade bîyî. Konferansê Huqûqnasanê Kurdan ê Demokratîke bi eşkerekerdişê netîcenameyî qedîya.

 

Hemverfeka Komîsyonê Huqûqî ya Partiya Têduştî û Demokrasî yê Şaran (DEM Partî), avûkate Sevda Çelîk Ozbîngole tewrê konferansî bîye û derheqê muhtewa û munaqeşeyan de JINNEWSî rê qisey kerd.

 

‘Munaqeşeyê derheqê hetanê sîyasî û huqûqî yê prosesî de’

 

Sevda Çelîk Ozbîngole dîyar kerd ke rojeva huqûqê demokrasî û sîyasetê demokratîkî wextêko derg o munaqeşe kenê û vat ferz o ke hetê sîyasî û huqûqî yê prosesî pîya bêrê erjnayîş û wina vat: “Sereyê Komîsyono ke meclîs de ame awankerdiş, pozîsyonê meclîsî, sewîyeya saziyanê cimatê sîvîlî, qedîyayîşê têkoşînê çekdarî û bi metodanê aştîyane û demokratîk munaqeşeyê huqûqî yenê rayra berdene. Eke ma nê munaqeşeyan rayra berdê, no tenê sereyê vatişî nêbeno; semedê awanbîyayîşê şertanê asayîşî û zemînê huqûqî ganî nêzdî ra nê problemî serê zemînê huqûqî bêrê çareserkerdiş. Muhtewayê nê de averşîyayîşê demokratîkî, heqê hemwelatîbîyayîşê têduştî, azadîya fikr û fehmî estê.”

 

Faliyetî do dewam bikerê….

 

Sevda Çelîk Ozbîngole dîyar kerd ke aştî tena mesajêk muzakereyî ya hetê teknîkî de nêbena û wina va: “Problemê ke heta nika ameyî ciwîyayene, semedê nêbîyayîşê statuyê şarê kurdî, asayîşê qanûnî û huqûqî ameyî meydan. Ganî proses bi pêroyî bêro erjnayîş. Heme huqûqnasê Tirkiya û Kurdistanî, baroyê herêmî, komîsyonê huqûqî, komîsyonê huqûqî yê DEM Partî, OHD, ÎHD, DAD û zaf kesî nê di aşmî yo serê sernameyanê cîyayan de munaqeşeyan rayra benê. Atolyeyan de munaqeşeyê cidî ameyî kerdene û konferansan de sernameyî ameyî erjnayîş. Faliyetê ma do dewam bikê.”

 

Semedê awankerdişê aştîye veng

 

Sevda Çelîk Ozbîngole wina peynîya qiseykerdişê xo ard: “Proses dewam keno û semedê nê zî sebebê cagirewtişê heme huqûqnasan ê nê prosesî de pîl o û na çarçewa de ma sey destpêk gênê dest. Faliyetê ma yê nêzdî ra bi heme binyatanê xo de ma zemînê faliyetê awankerdişêko demokratîkî de yenê têhet. No konferansêk zaf bi fêde û rind bi. Ma do aştîye zî pîya awan bikerê.”