MERKEZÊ XABERAN - Kobanê de siyasetmedaranê cinîyan desteştişê fotografanê şehîdanê ser, cinîyan şermezar kerd û da zanayene ke no hêrişê verba pîrozîyê cimatî, îrade û yewbîyayîşê şarî yo, cinîyan sazîyanê asayîşî ra waşt ke berpirsîyarê nê kerdişî lezkî bêrê muhakamekerdiş û cezakerdiş.

 

Siyasetmedarê cinîyî yê bajarê Kobanê de, derheqê desteştişê fotografanê şehîdanê cinîyan ê bajarê Hesekê ser de, verê bînaya Nuştegehê PYD’yî de bi tewrbîyayîşê temsîlkarê rêxistinanê cinîyan, eşkerayîyêk da. Eşkerayîye hetê endama heyetê îdareyî ya Partîya Yewbîyayîşê Demokratîk (PYD) Bediya Miho ra ameye dayene.

 

Bediya Miho da zanayene ke şehîdî sembolê azadî û rûmetê şarî yê, pawitişê vîrardişê înan wezîfeyê tewr bingehîn ê exlaqî û neteweyî yo, şehîdî pîrozîyê şarî yê û tu kes nêeşkeno desteştişê erjê înan rê bikero û vat: “No kerdiş hewldayîşêk eşkera yo semedê tehrîkkerdişê şarî û binpaykerdişê erjanê pîrozan ê şehîdan o, no hêriş teyna verba fotografanê şehîdan nîyo, o verba îrade û yewbîyayîşê şarê ma yo.”

 

Bediya Miho dîyar kerd ke nê erjî û destkewtişê bîyaye bi xoverdayîşêko pîl ameyî destkewtiş, ê bi tu hawayî nê hêrişan qebûl nêkenê. Bediya Miho veng da hukmatê demkî yê Sûrîye ke goreyê peymanan têbigêrê, sewbîna veng da terefanê wezîfedaran û sazîyê asayîşî ke berpirsîyarê nê kerdişî lezkî bêrê muhakamekerdiş û cezakerdiş.