Gulîstan Gulmuş

 

AMED - Rojnamegere Ciwana Cuma ke hesabê medyaya dijîtale ser o hedef ameye girewtiş, dîyar kerd ke sazgehê ke vanê heqê rojnamegeran pawenê ça de yê, do key wayîrê heqê rojnamegeran vejîyê? Ciwana Cuma, wina vat: "Do bi ruhê Cîhane û Nazimî heta peynî nê awbendî de bibê vengê şarî."

 

Şero ke 27ê teşrîna peyêne 2024ine de Vakur û Rojhelatê Sûrîye ame destpêkerdiş dewam keno. Germbîyayîşê şero ke bi seyan kesî ameyî qetilkerdiş û bi hezaran koçberî bî, her ke şino giran beno. Yew koma ke tewr zêde hêrişan dir yena rî bi rî, xebatkarê çapemenîya azade yê. 19ê kanûna 2024ine de muxabîra Ajansê ANHAyî Cîhan Bîlgîn û Nazim Daştan netîceya hêrişê SÎHAyê Tirkîya de ameyî qetilkerdiş. Badê rojnamegere Ciwana Cuma ke têgêrayîşê Awbendê Tişrînî û herême rayaumûmî rê neql kerd serê hesabê medyaya dijîtale de hedef ameye girewtiş.

 

Rojnamegere Ciwana Cuma derheqê hedefgirewtişî de ajansê ma JINNEWSî rê qisey kerd.

 

'Wazenê vengê heqîqetî bibirnê’

 

Ciwana Cuma wina dest pêkerd: “Ez Ciwana Cuma. Vakurê Sûrîye de rojnameger a. Nika herêma ke xoverdayîşê Awbendê Tişrînî yeno dayîş de ya. No demêk derg o îşxalkerdişê Tirkîya hemverê çapemenîya azade, hemverê rojnamegerê ke vengê raştîye neql kenê hêrişî dewam kenê. Nê hêrişî newe nîyê. La serra xoverdayîşî de zî ame vînayîş ke xeylêk hevalê ma yê rojnamegerî hetê Tirkîya ra û çeteyê girêdayeyê ci hedef ameyî girewtiş. Bi desan hevalê ma netîceya nê hêrişan de dinyaya xo bedelnayî. Înan raştî neql kerd û amancê înan vetişê heqîqetî bî. Ewro rewşa rojhelatê Sûrîye de yeno ciwîyayîş tesîr serê pêro Sûrîye keno. Nê semedî ra zî dewleta tirkan polîtîkaya xo ya lêşin dewam kena  û wazena vengê heqîqetî pada. Wazena vengê rojnamegeran bibirna. Nê semedî ra zî hevalê ma hedef ameyî girewtiş û qetilkerdiş.”

 

‘Ma bi qelema Cîhane û Nazimî benê cewab’

 

Ciwana Cuma dewam de vat: “Hevalê ma hedef ameyî girewtiş. Nazim û Cîhane polîtîkaya şerê taybetî teşhîr kerdî. Nê ra raşte raşt hedef ameyî girewtiş û qetilkerdiş. Bi taybetî ma rojnamegerê cinî, herêma xoverdayîşo ke serkêşîya ci kenê cayê xo gênê û vengê şarî danê eşnawitiş. Ma bi ruhê Nazimî û Cîhane îşxalkerîya Tirkîya bi rayaumûmî danê parekerdiş. Ma bi qelema înan benê cewabê polîtîkaya şerê taybetî.”

 

‘Ma hîna zêde xurt benê’

 

Ciwana Cuma dîyar kerd hemverê hêrişan de têkoşînê xo dewam kenê û vat: “Ez zî rojnamegerêke pêwa pêro hêrişan tîya şuxilêna. Sazgehê ke vanê ma heqê rojnamegeran pawenê ça yo ça de yê, do key wayîrê heqê rojnamegeran vejîyê? Ewro verê çimanê pêro dinya de rojnamegerê Vakur û Rojhelatê Sûrîye şuxilênê hedef yenê girewtiş. Ma sozê xo yê semedê Cîhane û Nazimî eynî kenê. Ma do bi ruhê înan bibê vengê şarê xo. Ma reyke bîn Tirkîyaya îşxalkere rê nê vanê, şima hevalanê ma şehîd kerd, şima vanê qey ma do bêmoral bê. Her ke şima hêriş bikerê, ma do hîna zêde xurt bibê.”