NAVENDA NÛÇEYAN - Li Êlih û Sêrtê, girtina Makbule Ozer hate şermezarkirin û daxwaza berdana wê hat kirin. 

 

Girtina Makbule Ozer a 82 salî li Êlih û Sêrtê hat şermezarkirin. 

 

Êlih

 

Rêxistina Partiya Wekhevî û Demokrasiyê ya Gelan (DEM Partî) ya Êlihê careke din girtina Makbule Ozer a 82 salî protesto kir. Têkildarî mijarê li Parka Yilmaz Guney daxuyanî hate dayîn û aktîvîstên Tevgera Jinên Azad (TJA), Meclisa Dayikên Aştiyê, Partiya Herêmên Demokratîk (DBP) û Platforma Ked û Demokrasiyê ya Êlihê tev li bûn. 

 

Hevserokê DBP’a Navçeya Navendî Serhat Ayebe di daxuyaniyê de axivî û ji ewil êrişên li dijî Çapemeniya Azad şermezar kir. Bi domdarî Serhat bal kişand ser girtina Makbule Ozer a 82 salî û wiha got: “Cezayê lê hatiye birîn û tiştên di pêvajoya ATK’ê de qewimîn, mînakên derhiqûqtiyê bûn. Makbule Ozer nikare bi tena serê xwe bijî lê tevî vê yekê jî saziyên dewletê gotin ‘dikare.’ Tu aliyekî hiqûqî yê vê raporê nîne. Divê Makbule tavilê were berdan.” 

 

Sêrt 

 

Bi heman mijarê li Sêrtê li pêşiya avahiya DEM Partiyê ya bajar jî daxuyanî hate dayîn. TJA, Meclisa Dayikên Aştiyê, DBP û DEM Partî tev li daxuyaniyê bûn. Hevserokê DBP’a Navçeya Navendî Şernas Çelepkolu daxuyanî xwend. Di daxuyaniyê de hat xwestin ku Makbule Ozer demildest were berdan.