ŞIRNEX - Çalakiya nobetê ya ku Meclisa Dayikên Aştiyê bi dirûşma “Ji şer re na, a niha aştî” li Silopiyayê daye destpêkirin di roja 3’yemîn de didome. 

 

Endamên Meclisa Dayikên Aştiyê li bajarokê Tilqebînê ya navçeya Silopiya ya Şirnexê bi dirûşma “Ji şer re na, a niha aştî” çalakî dabû destpêkirin. Çalakiya Dayikên Aştiyê di roja 3’yemîn de didome. Ji Amed, Wan, Êlih, Mêrdîn, Colemêrg, Riha, Sêrt, Îzmîr û Mêrsînê jî gelek Dayikên Aştiyê di çalakiya nobetê de cih digirin. 

 

Wê daxuyanî were dayin

 

Çalakî, li pêşiya avahiya DEM Partiyê ya Tilqebînê tê lidarxistin. Coşa dayikan a di nobetê de rê li ber dîmenên rengîn vedike. Dayikan gelek caran li çepikan xistin, tililî avêtin û dirûşma “Jin, jiyan, azadî” berz kirin. 

 

Tê payin ku çalakiya dayikan îro bi daxuyaniyekê bi dawî bibe.