NAVENDA NÛÇEYAN - Çalakiya rûniştinê ya ku li Cenevreyê ji bo  azadiya fîzîkî ya Rêberê Gelê Kurd Abdullah Ocalan, ket di meha 55’an de. Di çalakiyê de salvegera 102’emîn a Peymana Lozanê hat protestokirin û li dijî polîtîkayên înkarê banga kombûna li dora Abdullah Ocalan hat kirin.

 

Çalakiya nobetê ku ji bo azadiya fîzîkî ya Rêberê Gelê Kurd Abdullah Ocalan ji 25’ê Çileya 2021’ê ve li pêşiya Ofîsa Neteweyên Yekbûyî (NY) a li Cenevre ya Swîsreyê dewam dike, ket di meha 55’an de.

 

Di çalakiya vê hefteyê de ku di çarçoveya pêngava “Dem dema azadiyê ye” her Çarşemê tê lidarxistin, îşaret bi salvegera 102’emîn a Peymana Lozanê hat kirin. Di çalakiyê de polîtîkayên înkar, asîmîlasyon û qirkirinê yên li dijî gelê Kurd hatin protestokirin.

 

Çalakvanan diyar kirin ku Peymana Lozanê ku sala 1923’an di berjewendiya emperyalîst de hate îmzekirin, kevirê bingehîn a statukoya ku îradeya gelê Kurd tunedihesibîne ye. Her wiha banga tevlîbûna xurt a bi paradîgmaya Aştî û Civaka Demokratîk a Abdullah Ocalan ku ji bo meşa ku di 26’ê Tîrmehê de li Lozanê bê lidarxistin hate kirin.

 

Çalakî bi deqîqeyekî rêzgirtinê destpê kir.Piştre li ser navê Komîteya Çalakiyê ya Cenevreyê Veysel Kuşkanadi axivî.  Veysel Kuşkanadi salvegera 13’emîn a Şoreşa Rojava silav kir û bal kişand ser banga aştî û çareseriyê ya Abdullah Ocalan. Veysel Kuşkanadi diyar kir ku merasîma şewitandina çekan a Koma Aştî û Civaka Demokratîk îfadeya herî şênber a îradeya aştiyê ye û wiha got: “Aştî ne yek alî, bi gavên beramber pêkan dibe.”

 

Hevserokê Navenda Civaka Kurd a Demokratîk a Cenevreyê Osman Tekîn daxuyaniya heftiyane da û bal kişand ser Peymana Lozanê û got, “Bersiva herî xurt a li hemberî rejîmên ku îro vê statukoyê didomîne, modela çareseriya konfederal a demokratîk a Rêber Apo ye.”

 

Piştî daxuyaniyê çalakiya rûniştinê heta saet 17:00’an dewam kir.