NAVENDA NÛÇEYAN - Rêxistina Kurdistan Helps li Xurmalê bi armanca tespîtkirina zû ya nexweşiyê û parastina tenduristiya jinan, kontrola pêşwext a penceşêra sing (memik) ji bo jinan encam da.

 

Di çarçoveya xebat û çalakiyên xwe de, Rêxistina Kurdistan Helps dest bi pêkanîna kontrola pêşwext ji bo jinên temenê wan li ser 35 saliyê re kiriye. Jinan giringiyeke mezin da vê pêngavê û beşdarî kampanyayê bûn; her wiha berpirsên çalakiyê daxwaz ji jinan dikin ku hîn zêdetir beşdarî van kontrolan bibin.

 

Li Nexweşxaneya Şehîd Elî Şîe, Rêxistina Kurdistan Helps di bin dirûşmeya “Derfetekê bide jiyana xwe” de, kontrola pêşwext a penceşêra singê ji bo jinên temenê wan ji 35 saliyê mezintir re encam da.

 

Li ser vê mijarê, endama Rêxistina Kurdistan Helps Zeyneb Emîn ji Ajansa Rojnewsê re axivî û ragihand ku di çarçoveya berdewamiya çalakiyên wan ên ji bo hişyarkirin û pêşvebirina tenduristiya jinan de, wan ev kampanya li herêma Xurmalê destpê kiriye. Ev çalakî ji ber dûrbûna nehiya Xurmalê ji navendên parêzgehan ve hatiye organîzekirin, daku parastina tenduristiya jinên li ser 35 saliyê re were kirin.

 

Zeyneb Emîn got ku armanca sereke ya vê kampanyayê tespîtkirina nexweşiyê û parastina tenduristiya jinane; da ku di rewşa dîtina nexweşiyê de, hewldan werin kirin ku di wextê herî zû de çareseriya pêwîst ji bo nexweşan re were dabînkirin.

 

Çinur Behroz ku wekî jineke ciwan ji bo encamdan û çêkirina kontrole serdana nexweşxaneyê kiribû, ji Ajansa Rojnewsê re axivî û got: “Ev kampanya pir girînge, ez hêvî dikim ku hemû jin werin û kontrola xwe bikin, daku ji tenduristiya xwe pişrast bibin. Divê jin fedî nekin, ji ber ku ev nexweşî ye û tu şerm tê de nîne.”