Sema Çaglak

 

ŞIRNEX - Dayîkê Botanî reaksîyon vera festîvala muzîkî yê ke kulturê Şarê Kurdî û hetê hukmetî ra yeno waştiş ke Cizîr de organîze bikerê, dayî. Dayîkan dîyar kerd ke bi zanebîyayîş Cizîr de festîvalêke bi nê rengî  organîze kenê û na festîvale hemverê Botanî de hêrişêk xususî yo.

 

Cizîr de Şirnex de 30ê teşrîna verêne de bi rayberîya walîyî, qeymeqamî û qeyûmê Şaredarîya Cizîre, “Festîvala Muzîkî ya Cizîrî By. Mr. Dosso Dossi” bêro organîzekerdiş. Yeno vatiş ke festîvale do Parkê Mem û Zîne de bêro organîzekerdiş. Reaksîyon û nêrazîbîyayîşê hemverê festîvale her ke şino zêde benê. Endamê Dayîkê Aştîye yê Botanî zî hemverê festîvale nêrazîbîyayîşê xo mojna û dîyar kerdî ke wa Şarê Kurdî wayîrê kultur û tarîxê xo vejîyo.

 

Gulîstan Hezere, dîyar kerd ke Cîzîr Botan bi dewlemendîya tarîxî û kulturê xo yeno naskerdiş û wina qisey kerd: “Cizîrê Botanî de cayê bapîr û dapîrê ma yê. Mîrasê Zîne yo ke ma rê ameyo verdayîş. Ma nêwazê tu kes bêro serê kultur û adetê ma de festîval organîze bikero. Wa şarê ma bi înan nêxapîyo. Bi seyan serre yo Cizîra Botan bi kultur û adetê xo yeno şinasnayîş. No kulturo ke ma rê ferz kenê ê ma nêyo û wazenê ke kulturêkê bîn ma rê ferz bikerê.”

 

‘Bi zanebîyayîş festîvalêke wina cizîrî de organîze kenê’

 

Asîye Tay zî wina vat: “Ez venga ciwanan û şarê ma kena ke wa tewrê na festîvale nêbê. Na şahî kulturê ma nêya. Wa tu kes hemverê erjê Botanî şahiyan nêkero. Na festîvale xapinayîşê şarê ma ya û ganî tu kes bine nameyê kulturî nêrê xapênayîş. Bi zanebîyayîş Cizîr de na festîvale yena organîzekerdiş. Name û vengê kultur û tarîxê Cizîrê Botanî esto. Wazenê bi nê festîvale ciwanê kurdî tewrê xo bikerê û kulturê ma çin bikerê.”

 

‘Hemverê şarê Botanî de hêrişêk pîl o’

 

Emîne Alkiş zî dîyar kerd ke na festîvale wazenê ke parkê Mem û Zînî viraznê zerrîya ê dayikan veşnenê û vat: “Hem hemverê kulturê Botanî, hem zî hemverê erjê komelê kurdî bêrêzî û hêrîşêk pîl o. Ma nê qebûl nêkenê û şermezar kenê. Merdimê ke pey kultur û ziwanê xo bê, do tewrê nê bernameyê qeyûmî nêbê.”

 

‘Ganî na festîvale nêresa hedefe xo’

 

Emîne Ozeke daye zanayene ke ganî na festîvale nêresa hedefe xo û wina vat: “Ma prosesêko zehmetinî ra bîyarenî. Her hetî ra serê şarî m ara tewir bi tewir hêrişî pê yenî. Festîvale do parka Mem û Zîne de do bêra viraştene. Qedexeyê tebervejîyayîşî de cenazayê domananê ma devistî binê na parke. Coka ra viraştiş û tewrbîyayîşê festîvale hem hetê nameyê xo ra û hem zî seba domananê ma bêhurmetî yo û bêhutmetîya vera şarê ma yo. Ma dayîkê Botanî hemverê nê hêrişanê taybetan de veng bi kurdan kenî ke wayîrê kultur û tarîxê xo bivejîyî. Senî ke festîvala Sûrî ya Amedî nêresaye hedefe xo do na festîvale zî nêresa hedefe xo.”

 

‘Qirkerdişê vera Botanî rê êdî bes o’

 

Tewr peynî cinîyan ra Taybet Tatliye qisey kerd û dîyar kerde ke ganî kesê ke tewrê festîvale bibî wijdanê xo ra şerm bikerî û vat: “Ganî kesê ke tewrê festîvale bibî cêrzemînanê Cizîrî ra şerm bikerî. Ganî Dayika Taybet Înane ra û Pakîze Nayir, Sêve Demîr û Asya Yukselan ra şerm bikerî. Wa dewlemendîya kultur û tarîxê xo ra şerm bikerî û twrê festîvalêka hemverê kulturê xo nêbî. Kulturo ke ma ser de yeno ferzkerdiş, kulturê ma ra xeylê dûrî yo. Qirkerdişê vera Botanî rê êdî bes o.”