ÎZMÎR - Avûkate Kubra Denîz Çelîke da zanayîş ke erê bibo zî cezaya muebbeto giran ke dîya Cemal Metin Avciyî yena manaya tecellîyê edaletî û vat ke ê do seba Metin Avciyî zî şêrî Mehkemaya Berzî.

 

Serra 2020î de camêrdo bi nameyê Cemal Metin Avci (32) wendekara unîversîteye Pinar Gultekine (27) bi îşkence qetil kerd. Cemal bi sucê ‘Kiştişê bi hîsanê hove û bi ezîyet û kiştişê plankerde’ ra ame muhakemekerdiş û cezaya ke mehkemaya herêmî daye ameye xerepnayîş. Dima ra dewa reyna dîya destpêkerdiş. Roniştişê qerarî Daîreya Cezaya 4ine ya Mehkemaya Edlîyeyê Herêmî yê Îzmîrî de ame dîyîş. Mehkemaya Cezaya Girane ya 3ine ya Edlîyeyê Muglayî seba Metînî fînayîşê tehrîko nehet ca ardbî. Sewbîna derheqê ortaxê ci Şukru Gokhan Orhanî de zî qerarê beratî ameybî dayîş. Dewaya ke Mehkemaya Edlîyeyê Herêmî yê Îzmîrî de ameye dîyîş de cezaya muebbeto giran dîyaye Metînî û tarîkerdişê delîlan vera zî 4 serrî ceza dîya Mertcan Avci.

 

Avûkata dewaye Kubra Denîz Çelîke da zanayîş ke erê bibo zî edalet ame ca û vat ke derheqê Mertcan Avciyî de zî do qerarê Mehkemaya Edlîyeya Herêmî temyiz bikerê. Kubraye da zanayîş ke do derheqê versucanê binan de têkoşînê huqûqî bidê. Dayîka Pinar Gultekîne, Şefîka Gultekîne zî vat ke ê qerarî ra razî yî. 

 

'Ez do bi asanî rakewa’

 

Şefikaye da zanayîş ke erê bibo zî qeraro raşt ame dayîş û wina dewam kerd: “Ez do bi asanî rakewa.”

 

'Fistişê tehrîkê nêheqî nêame qebûlkerdiş'

 

Kubraye da zanayîş ke edalet erey kewto û fistişê tehrîkê nêheqî seba Metinî ameyo kerdiş. Kubraye dîyar kerd ke seba înan fistişê tehrîkê nêheqîzî zî  girîng bî ganî no seba Metînî bi ca nêameyîne û wina vat: "Ma vat, îfadeyê înan ameyê ezberkerdiş. Çike  tim cînayetê cinîyan de îfadeyê bi nê rengî yenê şuxulnayîş. Ewro erey bo zî edalet ame. Fistişê tehrîkê nêheqî ame wedaritiş. Coka zî Metin Cemal Avci cezaya muebbetê giranî girewt.”

 

'Do seba Mertcan Avci zî şêro Dadgeha Berzî’

 

Kubraye da zanayîş ke Cemal Metin Avci tena bi sereyê xo Pinare qetil nêkerdo û vat, ê derheqê  Mertcan Avci zî şîyê îstinafî. Kubraye vat, ê do seba Mertcan Avci zî şêrê Dadgeha Berzî. 

 

'Ê do hemverê versûcê bînî zî têkoşînê huqûqî bêro dayîş'

 

Kubraye da zanayîş ke hetê keyeyî de berat babeta vatişî yo û vat, ê do hemverê versûcê bînî zî têkoşînê huqûqî bêro dayîş.