Sema Çaglak

 

ŞIRNEX - Hemverfeka Partîya Çep a Keske ya qezaya Cizîrî Firdevs Poyraze da zanayîş ke bi serkêşîya cinîye, xebatanê weçînayîşî de netîce girewtî û vat ke serdestan vînî kerd û ê ser kewtî.

 

Partîya Çep a Keske goreyê netîceyê nefermî yê weçînayîşê 14ê Gulane bi dayeyê 9,33yî 23 bajaran ra 62 parlementeran vete. Partîya Çep a Keske reyna Meclîs de bî partîya hîrine. Şirnex de netîceyê weçînayîşî reyde Partîya Çep a Keske 3 parlementeran vete. Vejîya raşte ke weçînayîş de xeylê bajaran de rayê ke seba Partîya Çep a Keske hetê Portalê Partîyê Sîyasî (SÎPPORT) yê girêdayeyê YSKyî ra sere de MHPyî rê pêro partîyê ke Tîfaqê Cumhurî de ca gênî rê ame eştiş. Derheqê qewimîyayîşî de xeylê gerre û îtîrazî ameyî kerdiş.

 

Hemverfeka Partîya Çep a Keske ya qezaya Cizîrî Firdevs Poyraze derheqê netîceyê weçînayîşî û bêusûlîyê ke ameyî kerdiş de qisey kerd.

 

‘Şar paştîdayîşêk gird dano Partîya Çep a Keske’ 

 

Firdevse vat ke weçînayîş bi dîzî û hîleyan derbaz bî û wina domna: “Xeylê Kurd bi zafane raya xo da Partîya Çep a Keske la weçînayîşî de sey her reye dizî û hîle ame kerdiş. Xeylê rayê ma MHP û partîyê bînan rê ameyî eştiş. Seba na babete îtîrazê ma dewam kenê û ma waştişnameyê xo şirawenê. Şar paştîdayîşêk gird dano Partîya Çep a Keske û seba weçînayîşî seferberîyêk estbî. Xeylê kesî bi zerrîwazî xebata weçînayîşî de ca girewtî û seba asayîşê sindoqan hewldayîşêk gird estbî. Kesê ciwan ra bigêrêne heta kesê pîlî pêro weçînayîş de raşteyan de bî û serê sindoqan de bî.” 

 

‘Roja weçînayîşî polîsan abluqa kerd’

 

Fîrdevse dewamê qiseykerdişê xo de qala roja weçînayîşî ya Şirnexî zî kerd û vat: “Ma roja weçînayîşî de mekteban gêrayêne la ma dî ke weçînayîş de mekteban de xeylê astengîyî ameyî vetiş û teda ameya kerdiş. Polîsan mekteban kerdî abluqa û bi no hawa teda serê şarî de ame kerdiş. Zerreye mekteban de polîsî bi çekan gêrayêne. Prosesê weçînayîşî de hetê partîyê bînan ra xeylê kayî ameyî kerdiş. Vîrê şarî de têmîyanî virazîya û coka ra xeylê rayî ameyî betalkerdiş. Vera nê heme binpaykerdişan û tedayan de reyna ma 3 parlementeran vet.” 

 

‘Ma do îtîrazê xo dewam bikerê’ 

 

Firdevse, dewamê qiseykerdişê xo de dîyar kerd ke weçînayîş hawêrêk bêhuqûqî û hemverê demokrasî de pê ame û vat: “Seba her sindoqêke ma xeylêk kesan wezîfedar kerdibi. Bi qasê ke destê ma ra ame ma asayîşê sindoqan kerd labelê reyna zî dizdî ameye kerdiş. Her bajarêk de bi nê metodî binpaykerdiş ame kerdiş. Ma nê caardişî hemverê huqûqî de qebûl nêkenê û şermezar kenê. Weçînayîş bêdemokratbîyayîş ame kerdiş. Labelê ma do wayîrê rayanê xo vejîyê û nê talankerdiş û dizdî vejê werte. Hem rayê seba parlementerî hem zî rayê seba serekkkomarî ameyî diznayîş. Eke dizdî nêvirazîyayîne netîceyê weçînayîşî do xeylêk cîya bibayîne.” 

 

‘Serkêşîya cinîyan netîce girewt’ 

 

Firdevse, tewr peyîn bale ant serê zêdebîyayîşê vetişê parlementeranê cinîyan û vat: “Xebatê ma bi serkêşîya cinî ame rayraberdiş û netîceyê weçînayîşî cinîyan dîyar kerd. Partîya ke tewr zêde parlementerê cinî vet partîya ma bî. Bajarê ma bi ser kewt. Înan qezenc nêkerd ma qezenc kerd.”