WAN - Parlamentera Wanî Gulcan Kaçmaz Sagyîgîte da zanayîş ke seba aştî, azadî û têduştî bêro ganî kurdî weçînayîşê 28ê Gulane de bi şew û roje bixebetê û vat: “Tu çîyêk nêqedîyayo. Ma newe dest pê kenê. Bi seserran o ke ma têkoşîn rayra benê. Ma eşkenê netîceyê ci tacîdar bikerê. Ma do têkoşînê xo dewam bikerê.”

 

Weçînayîşê 14ê Gulane de Kurdistan de weçînitoxî Tîfaqê Cumhurî dayî vînîkerdiş. AKP-MHP yew bajarê Kurdan de daxî nêbî yewine. Îqtîdarê AKP-MHPyî bi bêusûslîyan rayê Partîya Çep a Keske seba xo eştî.

 

Parlamentera Wanî Gulcan Kaçmaz Sagyigîte derheqê netîceyê weçînayîşî û tûrê diyîne yê serekomarîye de ajansê ma rê qisey kerd. 

 

‘Ganî her embazêk berpirsîyarîya xo bîyaro ca’ 

 

Gulcane dîyar kerd ke weçînayîşê 14ê Gulane weçînayîşêk tarîxî bî û na çarçewa de Wan de heme tax û raşteyan de keye bi keye gêrayî û vat: “Her embazêk berpirsîyarîya xo ard ca. Yanî netîce heta cayêk serkewte bî. Ma nika kêmanîyanê xo vînenê û rexnedayîşê xo danê.”

 

Wan de parlamenterêk ame zêdekerdiş

 

Gulcane dewamê qiseykerdişê xo de ard ziwan ke demêk kilmo ke Partîya Çep a Keske dayî naskerdiş û wina vat: “Rîskê girewtişê HDPyî vera ma bi Partîya Çep a Keske reyde kewtî weçînayîş. Ma demêk kilm de partîya xo da naskerdiş. Kêmanî estbî. Qelsî estbî. Serkewtişo ke ameyo destfînayîş tay nîyo. Goreyê demê verênan Wan parlementerêk zêde kerd. Wan de xeylê kesî nêşîyî sidoqan ser. Pusulayan de mohrê hem Partîya Çep a Keske hem zî yê CHPyî ameyî fînayîş. Sewbîna xeylê zabitnameyan de ma dî ke rayê ma MHPyî rê ameyî eştiş. Ez roja weçînayîşî Artemîtî de wezîfedar bîya. 7 zabitnameyan de rayê ma MHPyî rê ameybî nuştiş. Ma îtîrazê nê çîyî kerd.” 

 

‘Bi wesîleya kurdan tûrê diyîne rê mend’

 

Gulcane bale ant bêusûslîyan ser û qiseykerdişê xo wina peynî kerd: “Roja weçînayîşî rewşa anormal estbî. Ma zanayêne ke do tay çîyî bivejî raşte. Senaryoya ke ameybî hadrekerdiş vernîya ma de bî. La eşkenê nê çîyî vajî ke weçînitoxê kurdî wezîfeyê xo ardî ca. Bi wesîleya kurdan tûrê diyîne rê mend. Ma kurdî wazenê ke cuyêka azad û têduştî bêro na herre ser. Seba nê çîyî zî ma têkoşîn danê. Ma do weçînayîşê 28ê Gulane yê serekomarîye de zî xebata xo bi şew û roje rayra bibî. Ez venga partîyanê muxalefetî kena. Ganî xebate hîna organîzekerde bêra rayraberdiş. Ma do sey Partîya Çep a Keske wezîfeyê xo bîyarî ca. Wa kes bêhêvî nêbo. Ma do ser bikewî. Do şar ser bikewo. Ma bawer kenê. Ma eşkenê netîceyî tacîdar bikerê.”