STENBOL - Temsîlkarê rêxistinê cinîyan derheqê tûrê diyîn ê weçînayîşê serekkomarî de qisey kerdî û dîyar kerdî ke ê do bi îqtîdarê serdest ê camêrdan bidê vînîkerdiş.

 

Weçînayîşê 14ê Gulane de pêwa ke bûusulî ameyî ciwîyayîş, Partîya Çep a Keske bi 62 parlamenterî kewte meclîs. Nîmeyê 62 parlamanteran cinîyan awan kerd û nê dir zî temsîlkarîya têduşt pê ame.

 

Endama cinî pîya bi hêz ê (KBG) Ferîde Eralp û endama Komeleya Demê Cinî Newroz Unverdî derheqê tabloyê meclîsî awan bîyo de muhîmîyê temsîlkaraya têduşt û prosesê bêro de tevgerê cinîyan do rayîrêk senîn taqîb bikerê qisey kerdî.

 

‘Ma do têkoşînê xo dewam bikerê’

 

Ferîdeye da zanayîş ke netîceyê weçînayîşan seba şaran zaf baş nêbo zî xeylêk sebebê ke têkoşîn bêro pîlkerdiş û hêvî bêro pawitiş estê û wina vat: “Beşêk pîl ê komelî Tayyîp Erdoganî ra vat nê. Ma nika şinê tûrê diyîn. Ewro ma meclîsêk tewr tarî ke îqtîdarê AKPyî 21 serrî ci de yo vînenê. Ma do şert û mercê ke Hîzbullah kewtê meclîsî de, têkoşînê xo dewam bikerê. Oyo ke Peymana Stenbolî wedarna, oyo ke heqê kurtajî çin kerd no îqtîdar o. Huda Par bi eşkera seba îstîsmarê tutan vano, ‘hînî goreyê emrê xo 15 serrî ra pîlêr asenê. Huda Par û Partiya Refahê Newe sey sozê weçînayîşî waşt ke heqê mîrasê têduşt destê cinîyan ra bêro girewtiş. Fehmêk ke cinîyan sey hacet vîneno, meclîs de serdest bî.” 

 

‘Parlamenterê cinî asayîşê ma yê la qîm nêkenê’

 

Ferîdeye bale ant serê têkoşînê cinî û wina vat: “Partîya Çep a Keske pêwa heme kayî û dizdîyê rayan meclîs de temsîlkarîya têduşt bi dest kerd. Partîya Çep a Keske seba wayîrê îradeyê şaran vejîyo hewldayîşêk pîlî da. Bi dayeyê tewr pîl ê parlamenterê cinî bi 31 parlamenterî kewt meclîs. Meclîs de bîyayîşê parlamenterê cinîyan seba ma asayîş o. La qîm nêkeno. Seba nê têkoşînê meclîsî zaf muhîm o la tîya ra tepîya ma cinî zî ganî hemverê zîhnîyetê tarî kuçeyan de xo ver bidê, têkoşîn bikerê.  Netîce çi beno wa bibo têkoşînê ma nêqedêno.”

 

‘Ganî ma hîna zêde rêxistinkerde û xurt bê’

 

Ferîde ard ziwan ke dimayê netîceyê weçînayîşan polîtîkayê îqtîdarê AKPyî de cinîya ciwan Kubra Ergun întîxar kerd û AKP vera ke cinîyan bipawo, şikdaran paweno û no zî beno peynîya cuya cinîyan.  Ferîde wina vat: “Ma şertê giranî de ciwîyenê. Demê kes tena maneno vano qey çîyêk bivurno. La ganî ma  xo vîr ra nêkerê. Ma tena nîyê. La nê welatî de tevgerê cinîyan, tevgerê femînîst esto. Ganî ma hîn zêde rêxistinkerde û xurt bê.”

 

Ferîdeye peynîya qiseykeridşê xo de bale ant weçînayîşê tûrê diyîne yê serekomarîye ser û wina peynî ard: “Ma do hem seba tûrê diyîne hem zî seba paştîdayîşî do têkoşînê xo gird bikerî. Bi tewrbîyayîşê xeylê cinîyê femînîste ma hewl danî Koma Kampanyaya Femînîstan a Seba Weçînayîşî aktîf bikerî. Ganî ma nêvajî ke Kemal Kiliçdarogluyî ma xelisneno. Ma do xo bixelisnî. Ganî ma têkoşîn bikerî. Ma berpirsîyarîya wayîrvejîyayîşê cuya xo bizanî.” 

 

‘Mekanîzmaya me ya pawitişî do hîna xurt biba’ 

 

Newroz Unverdîyw zî da zanayîş ke weçînayîşê 14ê Gulane de sey heme têgêrayîşê komelî têgêrayîşê cinîyan zî xeylê mana bare kerd. Newroze nê çîyan ard ziwan: “Netîceyê weçînayîşî de meclîsêk ke tede parlementerê Huda Par, Partîya Newera Refah tede bî, vetî vernîya ma. Kişta ci de muhîmîya têkoşînî zî seba ma vet raşte. Eke nê bikewî meclîsî o wext ma cinî zî do têkoşînê xo gird bikerî û xo biresnî heme cinîyan. Mekanîzmaya ma ya pawitişî do hîna xurt biba.”

 

Partîya Çep a Keske têkoşînê cinîye wayîr kena

 

Newroze bale ant temsîlkarîya seyyewbînan û wina peynî kerd: “Hetê Partîya Çep a Keske ra temsîlkarîya seyyewbînan ameye destfînayîş û no hetê dekewtişê sîyasetî yê cinîyan de xeylê muhîm o. Cinî polîtîkaya xo awan kena û vatişê xo vana. Meclîs de cagirewtişê zêde yê cinîyan zaf muhîm o. Beyannameyê cinîye yê weçînayîşî yê Partîya Çep a Keske muhîmî dano temsîlkarîya seyyewbînan. Coka ra partîya ke têkoşînê cinîyan wayîr kena ya. Têkoşînê ma do dewam bikero. Tûrê diyîne de amacê ma no yo ke ma nê îqtîdarî bidî vînîkerdiş.”