STENBOL- Merdimê tepişteyan dîyar kerdî ke heta tepişteyêk zindan de bimano do têkoşînê xo dewam bikerê û vatî ke heta Rayberê PKKyî Abdullah Ocalan azad nêbo problemêk çareser nêbeno. Merdimê tepişteyan venga hîsgêrîye bi heme keyeyê tepişteyan û rêxistinê demokratîkan kerdî. 

 

Zîndanan de binpaykerdişê heqan her ke şino giran beno û îqtîdar polîtîkayê pelçiqnayîş û ferzkerdişê ‘poşmanîye’ rayîr ra beno. Zîndanê ke açarîyayî raşteyê îşkenceyî de binpaykerdişê heqan vejîyayo merheleya tewr cor. Sewbîna tecrîdo giran yê serê Rayberê PKKyî Abdullah Ocalanî zî heme zîndanan û komelî ser de tesîr virazeno. Bi qedexe û bahaneyê cîyayan keyeyê tepişteyan nêeşkenê pêvînayîş pê bîyarê. 

 

Merdimê tepişteyan derheqê binpaykerdişê heqan ê zîndanan de qisey kerdî. 

 

Tehlîyeyê tepişteyo ke 30 serrî yo tepişte yo ame astengkerdiş 

 

Alî Şen zîndanê Tîpê Fyî yê Edîrneyî de tepişte yo. Cinîya Alî Şenî, Dondu Şene da zanayîş ke Alî Şen 30 serrî yo tepişte yo û her çend ke aşma verêne cezaya ci biqedîya zî nêame tehlîyekerdiş û wina vat: “Binpaykerdişê heqan resayo merheleya tewr cor. Problemê zîndanan zaf zêde bîyî. Înfaz yenê veşênayîş, tepişteyê nêweşan nêbenê nêweşxaneyan, wexto ke benê zî pê kelemçeyan benê. Seba ke şêrê nêweşxaneyan zî tepişteyî bi aşman yenê vindarnayîş. Mêrdeyê mi nêweş o. Va û nêweşîya masulkeyî ci de estê. Ganî dermankerdişê fîzîkî û amelîyat bibo. Tena mêrdeyê mi nê, ma xeylê tepişteyanê bînan rê zî eynî çîyî wazenê.” 

 

Bi xoverdayîşî cewab danê 

 

Donduye wina ard ziwan: “Hema hema her roje erzenê koxuşan ser de û gêrenê. Poşmanî bi mêrdeyê mi ferz kerdî. Ci rê vatî ‘ti qey tepişte yê, ti poşmanê yan nê’. Her çend ke cezaya mêrdeyê mi biqedîyo zî serbest nîno verdayîş. 6 aşme cezaya ci derg kerdî. Bi bahaneyê vengan înfazê ci veşênenê. Wa peynîya nê binpaykerdişan bêro. Vîşêrê xoverdayîşî tu çîyêk destê ma ra nîno. Ma estê û ma do bibê.” 

 

 Zîndanê Tîpê S û Yyî konseptê tecrîdî yê! 

 

Gulten Kahramana ke merdimê tepişteyan ra yew a da zanayîş ke şertê zîndanan roj bi roje giran benê û wina vat: “Mi nêzanayêne Tîpê S senî yê. Ez şîya zîndanê Sîncanî yê Anqaraye û mi dî ke Tîpê Syî senî yê. Abîdîn Kahraman û Ozgur Çelîke Edîrne ra surgunê Sîncanî kerdî. Odeyê yew û hîrê kat estê. Ode zî şenik ê. Saetê dîyarkerde de hîrê yan zî çar kes yenê têhet. Tewr peynî camê înan zî girewte yê. Tutî nê cam û sîstemê kamerayî semedo ke nêeşkayîne nefes bigîrê şikitî. La ceza dayî.”

 

‘Ma peyser game nêeşt’ 

 

Gultene dîyar kerd ke teda tepişteyan rê yeno kerdiş û wina vat: “Her tewir teda kenê û wazenê binhişê înan ci ra berê. Ez 70 serrî ya. 18 serrîya xo ra nê polîtîkayan vînena. Ez bi fikrê sosyalîst demokratîke pîl bîya. Her tim teda ameyî kerdiş. Serê ciwanan de tedayî ameyî kerdiş. Cehd kerdî ciwanan pasîfîze bikerê. Wazenê komelî goreyê xo awan bikerê la nêeşkenê ser bi kewê.”

 

Gultene peynîya qiseykerdişê xo de dîyar kerd ke dewlete bi nê polîtîkayan wazena têkoşîn çin bikero û wina venga têkoşînî kerd: “Na polîtîka faşîzmî ya dewlete ya. Wazenê merdimê rast û dûristî çin bikerê. Bi serran o nê kenê. Berpirsyarîya pîle kewena serê milê keyeyan. Ganî ma bikewê kuçeyan û çalakîyan bikerê. Ganî çalaki bêrê zêdekerdiş. Dadîyê Şemeyî bi serran o têkoşîn kenê. Ganî ma têhet de bê. Eke ma pasîf bê do tutê ma bêrê kiştiş.”

 

 ‘Ma peyser game nêerzenê’

 

Dadîya Aştîye, Çalakîkera Nobeta Edeletî û yew merdima tepiştetan Feleknaz Karabaş zî fikrê xo ard ziwan û dîyar kerd ke bi serran o hemverê bêhuqûqî têkoşîn kenê û wina vat: “Me tu wext têkoşînê xo ra peyser game nêeşt. Bi serran o merdimê tepişte yê. Yenê surgunkerdiş. Mêrdeyê mi 7 serrî yo tepişte yo.  Îşkence tepişteyan rê kenê. Mêrdeyê mi rê îşkenceyê giran kerdî. Semedê darbeyê serê xo ra girewto, nika nêweş o. Semedê ekonomî ez nêeşkena her tim şêrî pêvînayîşê mêrdeyê xo. Hem şuxilêna hem zî tutanê xo ra ewnîyena. Ma dadî her raşte de têkoşînê xo dewam bikerê. Serekê ma ra 33 aşmî yo agahî nîna girewtiş. Wa berê zîndanan abikerê. Ma girêdayeyê têkoşînê Abdullah Ocalanî yê. Heta Abdullah Ocalan azad nêbo do problemê safî nêbê.”