Neslîhan Kardaş 

 

WAN - Cinîyê ke wareyê rayîrşîyayîşê 25ê Teşrîna Peyêne derheqê hewldayîşî qedexekerdişê sloganê ‘Jin, Jiyan, Azadî’ de mîkrofonê ma rê qisey kerdî û vatî: “Heta ma bibê do felsefeya ‘Jin, Jiyan Azadî’ bibo. Zîhnîyetê serdest zî manaya ‘Jin Jiyan Azadî’ ra terseno. Arjantîn ra heta Hîndîstan, Hîndîstan ra heta Îran ‘Jin Jiyan Azadî’ ziwanê cinî ser o.”

 

Rayîrşîyayîşê 25ê Teşrîna Peyêne yê Wanî pê ame de cinîyan hemverê qedexeyî bi yew vengî ‘Jin Jiyan Azadî’ qîrayî û nê dir bale antî polîtîkaya tecrîdî ser o. Cinîyan meydanê 25ê Teşrîna Peyêne de mîkrofonê ma rê qisey kerdî û dîyar kerdî ke qedexekerdişê ‘Jin Jiyan Azadî’ semedê nê tu manaya ci çin o.

 

‘Felsefeya Jin Jiyan Azadî şîdetê camêrdan teşhîr kena’

 

Ayşe Ergun dîyar kerd ke felsefeya ‘Jin Jiyan Azadî’ her cayê dinya vila bîya û wina vat: “Ma ewnîyenê şîdetêk camêrdî yê hezar serrî est o. Sloganê cinî nê şîdetî pelçiqneno. Eynî wextî de ‘Jin Jiyan Azadî’ şîdetê camêrdan teşhîr keno û no zî camêrdî nêrehet keno. La ma do meydanan de nê felsefeyî bidê ciwîyayîş û sloganan berz bikerê.”

 

‘Ma do dest sloganê Jin Jiyan Azadî vera nêdê’

 

Cinîya bi nameyê Fatma Arslan zî wina vat: “Jin, Jiyan, Azadî hem bi pratîk hem bi vatişê dinya zî cinîyan rê bi rayîr. Ez nê mantiqê qedexeyî fam nêkena. Ma fek ‘Jin Jiyan Azadî’ ra vera nêdanê. Heta ke pêro cinî tewrê têkoşînî nêbê ma do têkoşînê xo dewam bikerê.”

 

‘Heta ma bibê felsefeya ‘Jin Jiyan Azadî’ bibo’

 

Leyla Çelîk zî wina vat:: “Jin Jîyan Azadî tena semedê ma sloganêk nîyo. Formê cuye yo. Semedê nê ez qedexekerdişê ci raşt nêvînena. No darbe yo û ma qebûl nêkenê. Heta ke ma bibê do felsefeya Jin Jiyan Azadî zî bibo.

 

Şengul Acîl zî wina vat: “Çi kenê wa bikerê, do nêeşkê zorê ma berê. Jin Jîyan Azadî, felsefeya ma ya. Ma fek ci ra vera nêdanê. Pêwa tedayan do nêeşkê zorê ma berê.”

 

‘Muhîmîyê qedexeyan çin o’

 

Rabîa Çakir zî dîyar kerd ke tu muhîmîyê qedexeyê sloganê ‘Jin Jiyan Azadî’ çin o û vat: “Ma vengê xo dayo eşnawitiş. Bi înat ma do xurt bibê. Ma vînî nêkenê û ma zaf xurt ê.”

 

Mizgîn Arvas zî ard ziwan ke do cinî her tim ‘Jin Jîyan Azadî’ dewam bikerê û wina vat: “Zîhnîyetê camêrdî manaya ‘Jin Jîyan Azadî’ ra terseno. Îqtîdar zano ke cinî çiqas xurt ê. Ma nê şermezar kenê."

 

Zeynep Tagtekîn zî dîyar kerd ke ‘Jin Jîyan Azadî’ sembola têkoşînî yê cinîyan o û wina vat: “Arjantîn ra heta Hîndîstan heta Îranî ‘Jin Jîyan Azadî’ ziwanê cinîyan ser o. No îqtîdar bi qedexeyê sloganî dayo ke hêzê cinîyan ra terseno.”