ANQARA - Destbendkerdeyê ke çarçewaya cipersayîşê merkezê Anqarayî de destbend bîyî, 10ê ci ardî Anqara. 

 

Çarçewaya Serdozgerîya Komare ya Anqarayî de vizêr Amed, Stenbol, Mêrdîn, Şirnex û Anqara zî mîyan de xeylêk kesî sereştişê keyeyan de destbend bîyî.

 

Destbendkerdeyan ra Hemşaredarê Peyasî yê Amedî Cengîz Dundar, Temsîlkara Hemsereka Pêroyî ya DEM Partîye ya Komîsyonê Kede Sevtap Akdag, awankerdoxa ÎHDyî Nîmet Tanrikulu, Serekê Genel-Îşî yê girêdayeyê DÎSKî Remzî Çalişkan, Leyla Dogan, Şîar Rişvanoglû, Erdal Guzel, Halef Caruş, Faruk Ayhan û Ecevît Odabaşi ardî Anqara.

 

Semedê qerarê sînorkerdişê dosyaye, avûkatê destbendkerdeyan ewro eşkayî miwekîlanê xo dir pêvînayîş bikerê. Yeno pawitiş ke roja îne îfadeyê destbendkerdeyan dozgerî de bêro girewtiş.