Pelşîn Çetinkaya

 

AMED - Cinîyan semedê kongreyo ke 24ê Kanûne de hetê Meclîsê Ciwanan ê DEM Partîye ra yeno organîzekerdiş venga tewrbîyayîşî kerdî û cinîyan vera hêrişê sîstemî de şar dawetê kongreye kerd. 

 

Meclîsê Ciwananê Partîya Têduştî û Demokrasî (DEM) 24ê Kanûne roja Yewşeme saet 10:00î de Amed de bi sloganê “Vejînek Ciwan” do 1ine Kongreya xo ya Asayî Salona Veyve ya Geterlerî de pê bîyaro. Kongreya ke do Hemserekê Pêroyî yê DEMî Tuncer Bakirhan zî tewrê ci bibo de do rojeva ciwanan de babetê sey "tecrîd", "polîtîkayê şerê taybetî", tîryakî û polîtîkayê asîmîlasyonî yê serê ciwanan ke yenê rayîr ra berdiş, ca bigîrê. 

 

Ciwanî vera polîtîkayê sîstemî de têkoşîn kenê 

 

Endama Meclîsê Ciwanan a DEM Partîye Senem Erîşe dîyar kerd ke ê vera tersnayîş, asîmîlasyon, tepiştiş û destbendkerdişê hukmatê AKP-MHPyî de kongreyê ciwanan pê bîyarê û dîyar kerd ke kongre de amanc no yo ke coşê ciwanan biresnê raşteyan. Seneme vat: "Netîceyê ci de ma pawenê ke tewrê heme dostê xo vera tehdîd, asîmîlasyon, tepiştiş, destbendkerdiş û polîtîkayê şerê taybetî yê rejîmê faşîst de vinderê."

 

'Bêrê ma pîya vera sîstemî de govende biçarnê' 

 

Endama Meclîsa Ciwananê DEM Partîye Hêlîn Koçake heme şarî dawetê kongreyî ke do bêro organîzekerdiş kerd û vat: "Bêrê ma pîya govende biçarnê û vera nê sîstemî de vengê xo berz bikerê." 

 

'Ma wayîrê ameyoxê xo bivejê’ 

 

Hemsereka Partîya Herêmê Demokratîke (DBP) ya Amedî Sultan Yaraye zî ard ziwan ke ciwanî ameyoxê şaran ê û vat: "Bê ciwanan kes nêeşkeno qala ameyoxî bikero." Sultane dîyar kerd ke ganî her kes paştîdayîş bido kongreya ke ciwanî do pê bîyarê û rayaumûmîye rê vat: “Ma heme pîya ciwananê xo û ameyoxê xo bipawê. Ma bi tewrbîyayîşêk xurt û zêde kongreye xo pê bîyarê.” 

 

Venga kongreya ke bi perspektîfê ciwanan bêra organîzekerdiş 

 

Hemsereka DEM Partîye ya Amedî Pinar Sakik Tekîne bi nê vatişan venga tewrbîyayîşê şarî kerd: "Seba ke ma bieşkê sîyasetê xo yê demokratîke ya ke ma dest pêkerdo, ciwanan ser bifînê û ciwanî bifikirîyê, ma venga her kesî kenê. Ma şarê xo seba kongreya ke ciwanê partîya ma do saete 10.00î de Salona Veyve ya Geterlerî ya Amedî de pê bîyarê, dawetê kongreye kenê."