AMED – Tepişteya nêweşe Sudan Guvena ke yeno şikkerdiş ke bi nêweşîya rîşa merdimwere kewta û tehlîyeyê aye 3 reyan ame astengkerdiş bi mektuba ke keyeyê xo rê şirawit, derheqê problemê xo yê weşîye de wina vat: “No 7-8 aşmê peyênan de probelmê mi est î. Ne vatî rîşa merdimwere ya û ne zî vatî rîşa merdimwere nîya. La dejê mi nêvindert, dewam kerd. Çar hetê cîya yê sîneyê mi de birîn estbî. Teşhîsê ewil mi rona û doktor zî vatişê mi tesdîq kerd." 

 

Her çend ke cezaya tepişteya nêweşe Sudan Guvena ke Zîndanê Tîpê Lyî yê Alanyaye yê Antalyaye de yena tepiştiş biqedîyo zî tehlîyeyê aye hetê Heyetê Çimdarî û Îdareyî ra 3 reyan ame taloqkerdiş. Sewbîna şikê nêweşîya rîşa merdimwere ke Sudane de est a zî yeno kerdiş. No 10 rojî ra zêde yo ke Sudane tedawîya dermanî kortîzonî vînena. Rewşa aye zî her ke şina xirab bena. Sudane bi mektuba ke keyeyê xo yê nuşte bale ancena serê prosesê xo yê zehmetin. 

 

Temamê mektube wina ya:

 

"Ma zanê ke na serra peyêne cuya ma ya hîsgerîye de tesîrêk senî viraşta. Ez xo zî daxîlê ci kena û eşkena vaja ke no proses ma ant mîyanê hîsgerîyêk gird û hema zî anceno mîyanê nê hîsgerîye. Ez bawer kena ke nê çîyî ra vanê xozaya merdiman. Beno ke mîyanê atmosferî de ez problemê xo zaf zêde nêeşka bîyara ziwan. 

 

No 7-8 serrê peyênî yo ke problemê mi est ê

 

Seke şima zanî xora no demêk derg o ke problemê mi yê weşîye est ê. La na merhela de nêbî. No 7-8 serrê peyênî yo ke problemê mi est ê. Mi waştêne vere cû zî şima rê vaja. Çike mi zanayêne şima do hîsin bibê û xo rê bikerê derd. Mi vatêne wa teşhis tesilî bibo ez wina pare bikera. La wext derg bî û mi zî wext rê verda. Ez eşkena vaja ke proses tay wina despêkerd.  

 

Dejê mi derbaz nêbî 

 

Verê muayeneyê cerrahê pêroyî, dima ra yê mamografî, ultrason, MR û dima ra ultrason her tim nedîyarîyêk estbî. Yanî nêvatî rîşa merdimwere la nêvatî nîya zî. Nê mabenî de mi ge ge antîbîyotîk şuxilna. La dejê mi debaz nêbî û dewam kerd. Tewr peynî şîya cerrahê pêroyî, mi sewqê cerrahê onkolojî kerd. Ez 20ê Teşrîna Verêne de şîya, hem muayene kerdî û hem zî bîyopsî kerdî. Dima ke bîyopsî kerdî bade 46 rojan mi reyna berdî nêweşxane û uca de wina vatî: “Zaf maneno rîşa merdimwere.” La semedo ke tam dîyar nîyo dest bi tedawîya kortîzonî yê 6 hewteyan kerdî.” 

 

4 hetê cîya yê sîneyê mi de birin est ê 

 

Nê mabenî de hewteyo verên taqîpkerdiş reyna do bêro ercnayîş, acaba aver kewto ya tepîya. Eke aver şêro reyna do bîyopsî bêro kerdiş. ‘Hewteyo verên Sudane reyna vatbî ganî bîyopsî bêro kerdiş.) Eke aver kewto se do raybazê cîya yê tedawîyî bêrê cerebnayîş. Semedo ke teşhîsê ewil tam zelal nêbî: ‘Enfeksîyonê binê dokuyê nerm’. Û enfeksîyonê dokuyê paştî dimayê demêk teqa. Coka ra nika 4 hetê cîya yê sîneyê mi de birin est o, îltîhap herikîyeno. Doktor vat herikîyayîşê îltîhabî baş o. No yew hewteyo mi destpêkerda. Ez nika parêz zî kena. Dermanan vera. Na babete de embazê mi yê tîya zaf hetkarîya mi kenê. Mi meraq mekerê. Rewşa mi û moralê mi baş o. Ez zî tena şima fikêrêna. Ez wazena şima nê çîyî zî bizanê… Silam û heskerdiş... 

 

Teşhîsê ewil mi rona û doktor zî tesdîq kerd 

 

Seke yeno zanayîş sebebe yewine yê nêweşîyanê winasî hîsinbîyayîş, stres û başnêbîyayîşê moralî yo. Demê peyênan de ma nê çîyan bi mirde xo ciwîyenê. Nê heme çîyî detêk de ez teber de bîya, ez bîya şahide hîkayeyê cinîyê ke vera problemanê winasî de têkoşîn kenê. Na rewşe hema o wext hêz da mi. Yanî ez xo û bedenê xo nas kena. Teşhîsê ewil mi rona û doktor zî tesdîq kerd. Wexto ke merdim xo nas bikero hêz û şîfa zî dano xo. Wa çime şima pey de nêmano. Embazê mi tîya de baş ewnîyenê mi û bi hewayêkê cîya mi reyde eleqedar benê. Heta ez ge ge heridîyena. Ez vana ‘Mi rehet biverdê’. Pansumanê cayê birînan ke her roje herikîyeno ez bi xo kena. Seke mi vat, nika çîyêk ke ez bikera çin o. Ma biewnî hele ka do dimayê tedawîya dermanan se bibo. Ez hêvî kena ke tay bibo zî na nêweşî mi ser ra şî. Ge ge merdim keweno rewşêk winasî ke xo baş bido vatiş. Ez bawer kena ke nika ez zî bi nê psîkolojîye têgêrena. Ez serranewa ya şima pîroz kena. Ez hêvî kena ke serranewe de heme dejê ma baş bibê… Silam û heskerdiş... 

 

Sudan Guven kam a? 

 

Sudan Guvene serra 2009î de qezaya Bismilî ya Amedî de sereştişê keyeyê xo de ameye destbendkerdiş. Sudane BDP de falîyetê sîyasî rayîr ra berdêne. Xebatanê xo vera ameye tepiştiş. Sudane 1ine Mehkemaya Cezaya Girane ya Erziromî de ameye muhakemekerdiş. Bi îddiayê sey "endamtîya rêxistine" 15 serrî û 3 aşm ceza ci rê ameye birnayîş. Sudane wextê înfazî yê 11 serran 5 aşmî û 23 rojî temam kerd. La reyna zî tehlîyeyê aye ke tay mendbî de hetê Heyetê Çimdarî û Îdareyî ra bi bahaneye "rewşe baş nîya" tehlîyeyê aye ame astengkerdiş. 3 reyan tehlîyeyê aye hetê Heyetê Çimdarî û Îdareyî ra ame astengkerdiş. 

 

Do Heyetê Çimdarî û Îdareyî seba Sudana ke şike rîşa merdimwere aye de est o 31ê Çeleyî de ercnayîş bikero.