Nazlican Nûjîn Yildiz

 

ÎZMÎR - Cinîyê Îzmîrî dîyar kerdî ke qirkerdişê cinî û şîdetê serê cinîyan bêceza manenê û dîyar kerd ke muhakeme hetgir o û bale ant serê muhîmîya Pêkerdişê Stenbolî. 

 

Hetêk de qetilkerdişê cinîyan dewam keno û heto bîn de zî muhakeme kiştoxan bêceza verdeno. Goreyê dayeyê ke çapemenîye ra ameyî arêdayîş aşma çeleyî de 27 cinî û 4 tutî ameyî qetilkerdiş. Sewbîna mergê 17 cinîyan û 3 tutan zî bi şikin o. Tena aşma sibate de rojêke de Bursa, Burdur û Xarpêtî de 5 cinî hetê camêrdan ra ameyî qetilkerdiş. Polîtîkayê bêcezaverdayîşî vera zî kiştişê newîye yê cinîyan rê rayîr abeno. Kiştişê cinîyan bi polîtîkayan yenê meşrukerdiş. 

 

Îzmîr de cinîyan ajansê ma JINNEWSî rê qisey kerdî û bale antî serê nizdîbîyayîşê muhakemeyî yê derheqê kiştişê cinîyan. 

 

‘Kiştişê cinîyan polîtîk o' 

 

Aylan Saglame da zanayîş ke fikr û fehmê cinîyan ê derheqê şîdetê hemverê cinîyan dîyar o û vat: “Ma mîyanê komelê serdest ê camêrdî de ciwîyenê. Êdî kiştişê cinîyan yeno meşrukerdiş. Pêkerdişê Stenbolî ame betalkerdiş. Zîhnîyetê muhakemeyi zî nê çîyan rê rayîr akeno. Kiştişê cinîyan polîtîk o. Fikrê ma û reaksîyonê ma kişta îqtîdarî de bê mana yo. Ma yewna wazenê ke Pêkerdişê Stenbolî bikewo dewre û wedaritişê qanûnê 6284î zî nêro munaqaşakerdiş. Ganî ma têkoşîn bikerê, xover bidê. Her ca de hêzê xo nîşan bidê.”

 

 'Ez xo asayîş de hîs nêkena’ 

 

Gîzem Tekîne zî da zanayîş ke ceza nêdanê kerdoxan û wina vat: “Kerdoxî serbest yenê verdayîş û mîyanê komelî de bi asanî gêrenê. Ma vanê Pêkerdişê Stenbolî bikewo cuye. Êdî Tirkîya de asayîşê cuya cinîyan qet nêmendo. Dimayê betalkerdişê Pêkerdişê Stenbolî kiştişê cinîyan zêde bî. Semedo ke cezayêk çin o, kiştox zî êdî nêtersenê. Goreyê zerrîya xo îşkence bi cinîyan kenê û şîdet bi cinîyan kenê. Ez qet qalê şîdetê psîkolojîk nêkena. Ez sey cinîye xo mîyanê asayîşî de hîs nêkena.” 

 

 'Ganî cinî û camêrdî bêrê perwerdekerdiş' 

 

Mefarete zî qiseykerdişê xo de bale ant serê sektorê fîlm û rêzefîlman û wina ercnayîş kerd: “Semedo ke kiştoxî û kerdoxî ceza nêgîrê zaf bi asanî têgêrenê. Na rewşe merdiman ver bi tehlukeye de bena. Demê verênan de zî estbî la her ke şino zêde beno, ganî êdî peynî bibo. Na rewşe ra selahîyetdarî berpirsîyar ê. Na rewşe de perwerde muhîm o. Ganî cinî û camêrd bêrê perwerdekerdiş. Ez nêzana do senî bêro çareserkerdiş, bi raştî ez tay zî bêhêvî ya. Nika her kes bi şîdetî reyde rî bi rî maneno. Ez xo asayîş de hîs nêkena.” 

 

 'Welatê xo terk kenê' 

 

Yagmur Başare da zanayîş ke eke cezayê giran nêrê dayîş do rewşa cinîyan dewam bikera û wina qisey kerd: "Vera qetilkerdişê cinîyan de ganî vengêk xurt bivejîyo raşte. Sewbîna kiştişê cinîyan polîtîk o. Heta ke cezayê giran nêrê dayîş, cinî do xo mîyanê asayîşî de nêvînê. Çîyo ke merdiman hers keno û hîsin keno zî no yo. Nika xeylê kesî xîret kenê ke welatê xo terk bikerê. Çike tîya de êdî cuyêka asayîş çin a.” 

 

‘Ganî ma têkoşînê xo pîl bikerê’ 

 

Gulten Koşune qiseykerdişê xo de bale ant serê şîdetê hemverê cinîyan û vat: “Ganî dewlete hemverê şîdetê serê cinîyan de tedbîr bêro girewtiş. Cuye nika bi wesîleya cinîyan yena pawitiş. La kiştoxê cinîyan zî nînê cezakerdiş. Zîndan de manenê dima ra vejîyenê çîyê hîna xiraban kenê. No neheqî û bêhuqûqî yo. Ganî bi lezkî dewlete tedbir bigêra. Ma zî ganî têkoşînê xo pîl bikerê.”

 

 'Ganî muhakeme bêhet bibo' 

 

Işil Sariye zî sey cinîyê bînan venga çareserîye kerd û vat: “Ganî îqtîdar problemê bîyaye bi lezkî çareser bikero. Ganî faîl cezayê tewr giranî bigîrê. Eke ceza bêra dayîş do problem çareser bibê. Goreyê mi ganî muhakeme bêhet bibo.”