Neslîhan Kardaş

 

QERS - Namzeta hemşaredarîye ya DEM Partî ya Qersî Arzu Savaş Dermane verê weçînayîşê 31ê Adare venga ‘bêrê ma pîya qeyûman bajarê xo ra bişirawê’ şarê Qersî kerd. 

 

Verê weçînayîşê herêmî yê 31ê Adare partîyê sîyasî lez dayî xebatê xo. Şaredarîya Qersî ke verê cu HDP girewtbî, aşma teşrîna verêne ya 2020î de qeyûm tayînê ci ame kerdiş. Namzeta hemşaredarîye ya Partîya Têduştîye û Demokrasîyî yê Şaran (DEM Partî) ya Qersî Arzu Dermane derheqê qeyûman û projeyê xo de ajansê ma rê qisey kerd. 

 

Arzuye serra 1976î de dewa Başkoyî ya Dîgorî de ameya dinya. Arzuye keyeyêke polîtîk de yena dinya û fikrê xo vera her tim yena surgunkerdiş. Arzuye dima ke lîse qedênena xebatê ciwan û meclîsê cinîyan de ca gêna. Arzuye dîyar kena ke Unîversîteya Yuzuncu Yilî ya Wanî wenda û 4 aşmî mezunîbîyayîşê aye ra ver xebatê ciwanan vera mekteb ra erzîyaya. Arzuye dima ke cuya mektebî qedîyena Qers û Agirî de bi hawayêkê aktîf sîyasetê de ca gêna û eynî wext de di kitabê şîîrî nuşta. 

 

‘Ez xo DEM Partîye de vînena’ 

 

Arzuye dîyar kerd ke adetê sîyasî ke ci ra yena vera DEM Partî de ca gêna û wina dewam kerd: “Nizdîbîyayîşê DEM Partî yê hemverê merdiman, metodê ci, nizdîbîyayîşê ci yê hemverê cinîyan, cuya ekolojîk, her hetî ra merdim xo DEM Partîye de vîneno. Coka ra ez zî DEM Partî de ya û kêfweş a.” 

 

‘Şar bi fikrê şaredarîya partîya ma bawer o’ 

 

Arzuye dewamê qiseykerdişê xo de wina vat: “Qers bajarêk ke kultur, bawerî û ziwanê cîya tede est ê, yo. Şarê tîya kulturê yewbînan ra tesîr beno. Mabenê înan de tu problemêk çin o, heta ke sîstem nêkerdê problem. Îqtîdaro yewperest mabenê merdiman de probleman vejeno û bi taybetî nê demê weçînayîşî de vejîyeno raşte. Xîret kenê ke şaran yewbînan ra bikerê û bîyarî vera yewbînan. La nika atmosferê Qersî xeylê weş o. Şar bi fikrê şaredarîya DEM Partîye ra bawer o.”

 

 ‘Zîhnîyetê qeyûm dişmenê cinîye yo’ 

 

Arzuye bale ant serê qeyûmê ke ameyî tayînkerdiş û wina vat: “Bado ke HDP şaredarî girewt şar zaf kêfweş bî. La dima ra qeyûm ameyî tayînkerdiş. Dima ke îradeyê şarî ame girewtiş seba Qersî tu xebate nêame kerdiş. Zîhnîyetê yewperestî heme îmkanan seba hetgiranê xo pêşkêş kerd. No zîhnîyetê dişmenîya cinîye yo. Koperatîfê cinîyan ke hemşaredara ma Şevîn Alaca awan kerdbî, projeyê kafeya mor, merkezê paştîdayîşê cinîye, xeta şîdetî û xeylê projeyê bîn ameyî girewtiş. Raşte heme mîyanê eşteyî de yo. Her çend ke çimeyê awe zaf bî zî hema problemê awe yeno ciwîyayîş.” 

 

Seba cinî, tutan û ciwanan proje 

 

Arzuye wina qiseykerdişê xo peynî kerd: “Ma şaredarî senî bigîrê ma do heme dezgehan newî ra akerê. Ma do seba ciwanan merkezê ciwanan akerê. Ma do meclîsê ciwanan akerê. Ma do falîyetê kulturî hîra bikerê, seba cinî û ciwanan raşteyê komelî akerê. Ma do raşteyê îstîhdamî awan bikerê. Ma do raşteyê huner, kreşe bi ziwanê dayîke, perwerdeyê zaf ziwanî û keyeyê hîkayeyan akerê. Ma do paştîdayîşê perwerdeyî, raşteyê sporê akerê. Vera tîryakî de ma do têkoşîn bikerê. Ez venga heme şarê ma kena. Bêrê ma 31ê Adare de qeyûman pîya bişirawê û bajarê xo pîya rayîr ra berê. Ma wayîrê îradeyê xo vejênê.”