WAN - Çalakîya Nobeta Edaletî ya Wanî de mesajê yewîtîye ame dayîş. 

 

Hemverê tecrîdî û semedê azadîya Abdullah Ocalanî 10ê Teşrîna Verêne de 74 merkezê dinya de bi sloganê "Abdullah Ocalan rê azadî, problemê kurdî rê çareserîya siyasî" kampanya ameye destpêkerdiş. 27ê Teşrîna Peyêne de zî zîndanê Kurdistanî û Tirkîya de tepişteyê sîyasî bi eynî sloganî grevê vêşanîye dayî destpêkerdiş. Dima ra merdimê tepişteyan eynî çarçewa de 8 cayê cîyayan de dest bi Nobeta Edaletî kerd. 

 

Bi serkêşîya Komeleya Paştîdayîşê bi Keyeyê Tepişte û Hukmweran reyde (TUHAYDER) û keyeyê tepişteyan bi sloganê “Seba edalete ma tecrîdî bişikinê, seba aştîye ma bibî vengê zîndanan” awanîya Partîya Herêmê Demokratîke (DBP) ya Wanî de çalakîya Nobeda Edaletî dîya destpêkerdiş. Çalakî 107 rojî yo dewam kena. 

 

Ewro xeylê kesî ameyî zîyaretê çalakîye û mesajê yewîye dayî. Nobete de Musevvet Bayhane qisey kerd û da zanayîş ke 3 aşmî ra zêde yo çalakîya xo kenê û vat: "Ma seba yewî, wayê û biratîye tîya de yê. Ma seba tepişteyê ke grevê vêşanîye de yê tîya de yê. Ma wazenê goş bidîyo waştişê tepişteyan." 

 

Çalakîye de sloganê “Biciwîyo xoverdayîşê zîndanan”, “Biciwîyo Serek Apo” û “Jin jiyan azadî” ame berzkerdiş.