ANQARA - Hemserekê Pêroyî yê DEM Partîye Tuncer Bakirhan û heyetê ci reyde serdayîşê ajansê JINNEWSî û MAyî kerd. 

 

Hemserekê Pêroyî yê Partîya Têduştîye û Demokrasîyî yê Şaran (DEM Parti) Tuncer Bakirhan û heyetê ci reyde bi minasebetê serrgêra Rojnamegerîya Kurdî buroyê ajansê JINNEWS û Mezopotamya (MA) yê Anqarayî zîyaret kerd. Rojnameger û nuştox Huseyin Aykol, muxabîrê MA û JINNEWSî heyetî pêşwazî kerd. Tuncerî, serdayîşê JINNEWSî û MAyî de ard ziwan ke rojnamegerê kurdî 126 serrî yo bi bedelê ke danê heta ewro ameyê. 

 

Tuncerî, ard ziwan ke ê kîşte rojnamegeranê kurdan de yê û wina vat: "Ma sey DEM Partîye kîşte şima de yê. Bedirxanan ra heta Apê Musa û Nagihan Akarselan rojnamegerîya kurdî heta ewro ameya. Rojnamegerîya kurdî ewro bi Huseyin Aykolan dewam kena. Sîstem tewr zêde rojnamegeran keno hedef. Ma nê vindertişê şima yê bi qerar û israr silam kenê.”

 

Dima ra Huseyîn Aykolî, ard ziwan ke 22ê nîsane semedê rojnamegeranê kurdan manayêke pîl a û vat: "Na raywanî 126 serrî yo dewam kena. Ma nê karî dewir girewto. Ez serê serranê 1990î de tewrê xebatanê rojnamegerîye bîya. Ma dest bi amadekarîya Halk Gerçegi (Rastiya şarî) kerd. Ma şert û mercê zahmetî de dest bi xebatan kerd. Wayîrê çapxaneyan ra vatî, 'Şima rojnameyê ameyê komkerdiş çap bikerê, ma dest danê ser çapxaneyê şima'  Ma 22ê Nîsane de dest pêkerd, dewir girewt. 34 serrî yo bedelê zaf giranî yenê dayîş. Ma nêzdîyê 50 embazê xo nê oxirî de vînî kerd. Ma nêzdîyê 3 hezar kesî nê rayîrî de pîya rayîr ra şîyî. Hîn embazê ma sirgûnê ewropa bîyî. Hînî ameyî tepiştiş. Çi ame serê şarê ma, ame sereyê ma zî.”