Rozerîn Gultekîn

 

STENBOL - Cinîyê ke netîceyê weçînayîşê herêmî yê 31ê Adare de bîyî hêzê dîyarkerdoxî, venga rayîrberîyê herêmî kerdê ke newî ra awankerdişê bajaran de hemkarîye bikerê û dîyar kerdê ke do dîyarkerdox û şopdarê prosesî bibê.

 

Dimayê ke tîfaqê AKP-MHPyî weçînayîşê herêmî yê 31ê Adare de vînî kerd, cinîyan ancî zend û bendê xo tadayî û dest bi xebatan kerdî. Bi tayînkerdişê qeyûman reyde bajarê Kurdistan de destkewtişê cinîyan ame xespkerdiş, bajarê Tirkîya de zî xebatê cinîyan ameyê astengkerdiş û vindertiş. Dezgeh û dezgehê cinîyan qerardarîyê xo yê seba awankedişê bajarê newe anê serê ziwanî. 

 

Temsîlkarê rêxistinê cinîyan çîyê ke rayîrberîyê herêmî ra pawenê ajansê ma JINNEWSî rê ardî ziwan. 

 

'Ganî fehm bibedelîyo’ 

 

Rayîrberîyê Komeleya Wextê Cinîye Fatmanur Çeteye destpêkerdişê qiseykerdişê xo de bale ant serê netîceyê weçînayîşî û vat: "Zêdebîyayîşê hûmara hemşaredaranê cinîyan muhîm a. Cinîyê ke yenê weçînitiş gelo çend wayîrê fikre cinîye esas gênê. Sey Meral Akşener û Tansu Çîllere. Stenbol seba cinîyan bajarêke asaye nîyo. Cinî şewe nêeşkenê azad raşteyan de bigêrê. Ganî sere de raşte seba cinîyan asaye bibo. Ganî cinî asanî bieşkê bi şaredarîye reyde mîyanê têkilî de bê. Taxan de eşkenê kooperatîf û kreşan awan bikerê. Nimune kooperatîfî Amed de est bî. Şaredarîyê Bajarê Pîlî yê Amed û Stenbolî eşkenê pîya projeyan bifînê dewre. Ma sey Komeleya Wextê Cinîye ma do zîyaretê şaredarîyan bikerê. Tena wextê weçînayîşî de nê xebatan de zî ganî zîyaretê dezgehê sivîlî bêro kerdiş û xebatê hempar bêrê rayîr ra berdiş. Ganî xebatê sey atolye, perwerde, panel, projeyê îstîhdamî bêrê zêde kerdiş. Sewbîna eke şaredarîyan de serdestîya zîhnîyetê camêrdî bibo, kam ci partî bena wa biba fehm nêbedelîyeno. Ganî bi fehmê cinîye xebatî bêrê rayîr ra berdiş." 

 

 Dîyarkerdişê aqûbetê weçînayîşî 

 

 Endama Paştîdayîşê Morî Îrem Kayikçiye dîyar kerd ke polîtîkayê îqtîdarî vera krîzê ekonomîye her ke şino xorî beno û wina dewam kerd: "Şerê ke seba nanî yeno dayîş, aqûbetê weçînayîşî dîyar kerd. Cinîyan bi kînêk pîl û hêvîya bedilnayîşî verê xo dayî sindoqan. Hemverê faşîzmê AKP-MHPyî hêrsêk pîl est o. Sewbîna hêzo ke îqtîdarî eşkeno bibedelno yê cinîyan o. Sey Paştîdayîşê Morî Samandagî yê Hatayî de tîfaqê bedilnayîşî ê tecrubeyêke ma virazîya."

 

'Ganî parekerdişê tecrûbeyan dewam bikero’ 

 

Îreme da zanayîş ke hêvî kenê ke raşte û kuçeyan de cuya asayî awan bikerê û wina dewam kerd: "Seba nê çîyî zî do şopdarê prosesî bibê. Qey atargehê cinîyan nîno akerdiş? Qey bi asanî xo nêresnenê ŞONIMî? Qey raşte û wesayîtê mîyanê bajarî de asayîş de nîyê? Seba nê çîyî ma cinî do teda rayîrberîyê herêmî bikerê. Ma do bi rêxistin û dezgehê cinîyan reyde bêrê têkişt. Ma bi dezgehê cinîyan reyde dest bi kombîyayîşan kerd. Ma do yewîya xo pîl bikerê. Ma dest bi zîyaretê şaredarîyan zî kerd. Ma do taqîbkerdoxê nê prosesî bibê. Sîstemê hemserekatîye de Têgêrayîşê Cinîya Kurde tecrubeyêk bi dest vist. No metod rayraberdişê têkoşînî mojneno. Ganî parekerdişê tecrubeyan dewam bikero." 

 

 'Plankerdişê ke hêvî bidê komelî muhîm ê'

 

Paştîdayîşê Cinîyan ê Kirkyama Elîf Baysale zî dîyar kerd ke muxalefetê komelkî aver keweno û vat: "Şar sindoqan de cewab da faşîzmê AKP-MHPyî. No çî bî moral. Seba têkoşînê cinîyan netîceyê weçînayîşî muhîm bî. Semedo ke muxatabê ma dîyar bî û cinî eşkenê bi asanî dîyalog ronê. Ganî rayîrberîyê herêmî bi rêxistinê cinîyan reyde seba cinîyan polîtîkayê derheqê cinîyan de awan bikero. Hûmara kreşan ganî bêro zêdekerdiş. Ganî cinî bi asanî xo biresnê stargehan. Wexto ke no kar yeno kerdiş, eşkenê bi rêxistinê cinîyan reyde zî xebatan bikerê. Averberdişê mekanîzmayê winasî muhîm o. Plankerdiş û polîtîkayê ke hêvî danê komel, cinî, ciwan, karker û kedkaran muhîm ê.”

Öğe uzaklaştırıldı.