AMED - Tepişteyê sîyasî kampanyaya ‘Abdullah Ocalanî rê azadî û seba problemê kurdî çareserî ’ 4ê Nîsane ra tepîya bi ‘boykotê pêvînayîşê keyeyî, telefon û mehkema’ açarnayê hemleyêk newî. Merdima tepişteyî Şehrîban Uyanike venga her hetê komelî kerd ke wayîrê çalakîya tepişteyan bivejê. 

 

 

Rayberê PKKyî Abdullah Ocalano ke zîndanê Asayîşo Berz ê Îmraliyî de tepişte yo, 37 aşmî yo tu xeberêke nîna girewtiş. Tepişteyê sîyasî yê zîndanê vakurê Kurdistanî û Tirkîya çarçeweya kampanyaya mîyanneteweyî ya “Abdullah Ocalanî rê azadî, seba problemê kurdî çareserîya demokratîke” de 27ê Teşrîna Peyêne ya 2023yî de dest bi grevê vêşanîye yê bêdem û dorveger kerdbî û 4ê Nîsane ra nata çalakîya xo açarnayê hemleyêk newe. 

 

Merdima tepişteyan Şehrîban Uyanike derheqê çalakîya tepişteyan de û tecrîdî de qisey kerd.

 

‘Ne vengê kênaya xo û ne zî yê birayê xo eşnawena’ 

 

Şehrîbane dîyar kerd ke kênaya aye Leyla Uyanike zîndanê Cinîyan ê Sîncanî de ya û 2015î ra nata tepişte ya û cezaya ci rê ameye birnayîş. Şehrîbane wina dewam kerd: “Birayê mi Hasan Uyanik zî zîndanê Tîpê Hyî yê Erziromî de tepişte yo. Serra 2014î ra nata tepişte yo. Derheqê mergê Yasîn Boruyî û hîrê kesê bînî yê ke çalakîya Kobanê de dinyayê xo bedelnayî ra yeno muhakemekerdiş û her çend ke delîl çinî bo zî cezaya muebeto giran dîyaye. 4ê Nîsane ra tepîya tepişteyî nêvejîyenê pêvînayîş. Ez ne kênaya xo reyde û ne zî birayê xo reyde nêeşkena pêvînayîş bikera.”

 

‘Ma paştîya înan de yê’ 

 

Şehrîbane ard ziwan ke semedo ke kurd bîyê, bedelê giran dayê û wina dewam kerd: “Yewine guneyê ma kurdbîyayîşê ma yo. Semedo ke ma kurd ê ciwanê ma zîndanan de pelçiqîyayî. Ma her tim paştîya înan de yê. Ma xo înkar nêkenê. Ma kurd ameyê dinya. Se beno wa bibo ma kurdbîyayîşê xo ra dûrî nêbenê.” 

 

‘Çekê înan yê tewr pîl bedenê înan o’ 

 

Şehrîbane ercnayîşê xo wina dewam kerd: “Vera bêhuqûqîyan de tepişte kewtî grev. Çekê înan yê tewr pîl bedenê înan o. Kesebaya ma veşêna. Ma cayê xo de nêeşkenê vinderê. Qet çiyêk çin o ke ê heqdarê. La sey dayîkî kesebaya ma veşêna. Selahîyetdarî nêvînenê, nêeşnawenê û qisey nêkenê. Waştişê tepişteyan qebûl bibo do rewşa welat bibedelîya. La çi heyf o ke kes çîyêk nêkeno, veng nêkeno. Selahîyetdarî cayê xo de vindenê. Çalakîya tepişteyan kewta hemleyêk neweyî. Ma berpirsîyaran rexne kenê. Vanê ma misliman ê. La wa qala mislimantîye nêkerê.” 

 

Seba tepişteyan veng 

 

Şehrîbane qiseykerdişê xo yê peyênan de venga her kesê wayîrê wijdan û selahîyetdaran kerd û vat: “Barê tutanê ma zaf giran o. Wa berpirsîyarî tena serê milê ma û tutanê ma de nêbo. Ez venga heme kesê wayîrê wijdan û dayîkan kena. Wa wayîrê tepişteyan û çalakîya tepişteyan bivejê. Wa waştişê tutanê ma bêrê qebûlkerdiş.”