Gulîstan Gulmuş

 

AMED – Kaybaza Tîmê Futbolî ya Cinîyan a Amedsporî Ebru Doluye dîyar kerd ke wexto ke newe dest bi futbolî kerda, hetê dormeyê xo ra probleman ciwîyaya û vat ke bi taybetî kaybazê futbolî yê cinî yê kurdî hîna zêde bi probleman reyde yenê rî bi rî. 

 

Tîmê Futbolî yê Cinîyan a Amedsporî rê roj bi roje eleqe zêde bena û bale ancena serê xo. Kaybazê futbolî yê cinî, ewnîyayîşê ‘futbol kayê camêrdan o’ şikit û cinîyan rê bîyê îlham. Kaybaza Tîmê Futbolî ya Cinîyan a Amedsporî Ebru Doluye qezaya Erxenî ya Amedî de yena dinya. 11 serrî ya xo de dest bi sporî kena. Lîse de hetê mamosteyê perwerdeyê bedenî ra yena kişfkerdiş û verê aye danê kulubê futbolî. Ewil Tîmê Futbolî yê Cinîyan a Erxenî de vejîyena saha û dima ra kewena Tîmê Futbolî yê Cinîyan ê Amedsporî. Ebruye Unîversîteya Dîcle de zî Mamostetîya Perwerdeyê Bedenî temam kerda û nika Unîversîteya Çewlîgî de lîsansê berzî kena. 

 

Ebruye derheqê amancê Amedsporî de JINNEWSî rê qisey kerd. 

 

Ebruye qala prosesê xo yê destpêkerdişê futbolî kerd û vat: “Mamosteyê mi yê perwerdeyê bedenî verê mi da nê sporî. Mi sinifê 11ine de dest bi sporî kerd. Mi verê cû zî raşteyan de futbol û basketbol kay kerdêne. Mamosteyê mi dima ra performansê mi dî. Ez teşwîq kerda. Bi wesîleya ci derbazê futbolî bîya. Ewil tîmê Erganî de dima ra zî yê Amedî de mi ca girewt. Ez sezonêk tîmê Îzmîrî de bîya.” 

 

Vera reaksîyonan sere wedarit 

 

Ebruye qiseykerdişê xo wina dewam kerd: “Wexto ke mi newe qerar da ke ez bikewa futbol keye û dormeyê mi reaksîyon mojnayî. La mi qebûl nêkerd û sere wedarit. Mi vat ez do biba kaybaza futbolî ya bi lîsans. Mi xeylê zehmetî ant. Dayîk û pîyê mi destûr nêdayî. Mi qebûl nêkerd. Înan zî mîyanê wextî de çîyêk nêvat, musayî. Mi fikrê înan şikit.”

 

 ‘Ma hêzê cinîye vet aver’ 

 

Ebruye têkilîyê xo yê bi kaybazê futbolî yê cinîye yê xerîbî reyde zî wina ard ziwan û qiseykerdişê xo peynî kerd: “Ewil ma sey tirk dîyêne. Ma vanê ma kurd ê û ma wazenê bi nasnameyê xo yê kurdî bivejê aver. Destpêkerdişê sezonî de welatanê cîyayî ra kaybazî yenê tîya. Cinî her ca de zehmetîyan ancenê. Coka ra ma xîret kenê ke bibê yew. Ma xîret kenê ke paştîdayîşê xo bivejnê teberê sahayî zî. La ma vat ke ma kurd ê. Ê zî êdî vanê kurd. No gamêk muhîm o. Wa cinîyî hêzê xo ra bawer bikerê. Wa fek xîretkerdişê xo ra vera nêdê. Cinî eşkenê zîhnîyetê serdestî birijnîê. Tena seba futbolî nê seba her raşteyî ez vana. Wa hêzê xo bizanê. Ez hêzê xo dayîkê laçik sipîye ra gêna.”