Mîdye Miqted

 

HELEB - Muxabîra Stêrk TVyî ya kantonê Efrîn-Şehba Ferîde Zade nêrazîbîyayîşê xo yê vera hêrişê serê çapemenîya azade mojna û vat: "No hêriş her çar hetê Kurdistanî û teberê welatî de yeno kerdiş. Semedo ke rojnamegerî heqîqet vejenê raşte, hêrişê înan yeno kerdiş. Ma do timî xover bidê.”

 

Çarçeweya tehqîqato ke Serdozgerîya Komare ya Stenbolî rayîr ra berda de 9 rojnamegerî ameyî destbendkerdiş û 22yê Nîsane de saetê şewe de Belçîka de polîsan hemverê Stêrk TV û Medya Haber TVyî de sereştiş pê ardî. Reaksîyonê vera nê hêrişan her ke şino berz beno. Muxabîra Stêrk TVyî ya kantonê Efrîn-Şehba Ferîde Zade zî reaksîyon mojna û nêrazîbîyayîşê xo yê vera hêrişê serê çapemenîye mojna û vat: "Ma sey rojnamegerî vengê xo berz kenê û vanê ke girewtişê kelepulê ma, destbendkerdişê embazanê ma yê rojnemegeran do bibo sebeb ke ma fek xebata xo ra vera nêdê. Ma do timî sîyasetê înan yê lêşin û hovîtîya înan, bivejê raşte û bibê vengê şarê xo."

 

'Ma qet fek xebata xo ra vera nêda’ 

 

Muxabîra Stêrk TVyî ya kantonê Efrîn-Şehba Ferîde Zade da zanayîş ke hêrişê serê çapemenîya azade ya kurdî de huqûqî nîyo û wina vat: "Ma hêrişê polîsê Belçîka yê serê merkeze ma yê Stêrk TVyî bi şîdet şermezar kenê. Qewimîyayîşê winasî xeylê reyan ameyê kerdiş. No zî yew metodê tengkerdişê xebata resnayîş û rojnamegerîye yo. Eynî wextî de metodê astengkerdiş û tersnayîşê xebatkarê Stêrk TVyî yo. No hêriş tena serê merkezê Stêrk TVyî de nêameyo kerdiş, kişta ci de merkezê Medya Haber TV zî hêrişan ra para xo girewt. Dewletêke sey Belçîka ke venga demokrasî kena, ganî hemverê xebatê resnayîşî de hêriş nêkerdêne. Ganî eksê hêrişan îmkan bidayêne rojnamegeran ke bi hawayêkê azad xebata xo bikerê û raştîye taqîp bikerê. Çend hêriş ame kerdiş zî ma qet fek xebata xo ra vera nêda.”

 

'Semedo ke rojnamegerî heqîqet vejenê raşte, hêrişê înan yeno kerdiş' 

 

Ferîdeye dewamê qiseykerdişê xo de derheqê pêkerdişê dewletan û planê înan ê seba têngkerdişê xebatê rojnemegeran de wina vat: "Hende serrî yo ke televîzyonê Stêrk TVyî Belçîka de xebat keno la roja ma ya ewro de bi taybetî dimayê pêvînayîşê mabenê Serekomarê Tirkîya Tayyip Erdogan ê Başûrê Kurdistanî û welatê bînî hêriş zêde bî. Derheqê xeylê nuqtayan de pêvînayîş ame kerdiş, bi taybetî yê tewr ver bi çim qirkerdişê kurdan ê her hetî ra yo. No hêriş serê çar hetê Kurdistan û teberê welatî de yeno kerdiş. Semedo ke rojnamegerî heqîqet vejenê raşte, hêrişê înan yeno kerdiş. Ma do zî vera hêrişan de her tim xover bidê.”

 

'Ma do vera hovîtîye de bibê vengê şarî' 

 

Peynîya qiseykerdişê xo de Ferîdeye dîyar kerd ke pêro xebatkarê Stêrk TVyî hemverê hêrişan de fek xebata xo ra vera dayî û wina vat: “Pêroyê rojnemeger û xebatkarê Stêrk TVyî çar perçeyê Kurdistanî de, sewbîna heme dinya de çend hêriş bi înan bêro kerdiş zî ê fek xebata xo ra nêverdayî. Tena televîzyonê Stêrk TVyî nê her tewir hovîtî bi heme rojnamegerê kurdî yeno kerdiş û yenê destbendkerdiş. La rojnamegerê kurdî wezîfeyê xo, xebata xo nêdanê vindarnayîş. Dewleta Belçîka zana ke hêrişêk winasî normal nîyo. Ma sey rojnamegerî vengê xo berz kenê û vanê ke girewtişê kelepulê ma, destbendkerdişê embazê ma yê rojnemegeran do nêbo sebeb ke ma fek xebata xo ra biverdê. Ma do timî sîyasetê înan yê lêşin û hovîtîya înan, bivejê raşte û bibê vengê şarê xo."