Rozerîn Gultekîn

 

STENBOL - Şukran Aydogana ke tedaya dewlete vera koçber bîya û bi karkerîya domanîye bi serran keda aye ameya binpaykerdiş dima ra bîye hemşîre. Şukrane vat: “Mi şenikîya xo de herinda ke raşateyan de kay bikera mecbur menda ke bixebeta. No tena problemê mi nîyo yê heme dinya yo. Sîstemê xebatî bi temamî seba çinîkerdişê cuya merdiman o. Ganî têkoşîn hîna zêde xurt bibo.” 

 

Kedkar, karker, yê ke îdareyê xo kenê bi coş û heyecanêk pîl şinê 1ê Gulane. Ver bi 1ê Gulane de şar xo amade keno ke heq û waştişê xo bîyaro ziwan. Hetê ke çinî yenê hesibnayîş ra yew zî domanê karkerî. Karkerê ewro çi heyfo ke domanê karker yê vizêrin bî. Înan ra yew zî hemşîre Şukran Aydogane ya. Şukrane qala karkerîya domanan û binpaykerdişê sektore weşîye de kerd û vat ke ganî 1ê Gulane de têkoşîn bêro pîlkerdiş. 

 

‘Emrê xo yo ke ganî kay bikera de xebetîyaya’ 

 

Şukrane qezaya Ceyhanî ya Edene de yena dinya. Keye serranê 90î de Ceyhanî ra koçê Stenbolî keno. Şukrane ard ziwan ke aye wext dest bi xebate kerda û vat: “Ma ameyê Stenbol. Cuye tîya de zehmet bî. Şertê giran est bî. Ma Kurd bî. Bi aşman ma ban nêdî. Mi 10 serrîya xo de dest bi xebate kerd. Na rewşe texrîbatêk pîl serê ma de kerd. Ez 10 serrîya xo de tekstîl de xebetîyaya. Patron bi çimanê domanîye nêewnenê. Vanê ma çend bidî şixulnayîş. 11 serrî ez xebetîyaya. Sîgortayê mi nêame viraştiş. Emrê xo yo ke ganî kay bikera de xebetîyaya. No problemê mi nê yê dinya yo.”

 

 ‘Tutê kênayî karker zaf zêde yenê îstîsmarkerdiş’ 

 

Şukrane ard ziwan ke dimayê demêke xebat înan rê normal ameyo û vat: “11 serran xebetîyaya. Wexto ke mola ameyêne dayîş mi waştêne kay bikera la ez nêeşkayêne. Ganî mi xo pîl hîs bikerdêne. Ma 14 saetan xebetîyayêne. Tutîya ma ame diznayîş. Bîyayîşê ma çinî ame hesibnayîş. Karkerîya tutîye normal ameyêne dîyîş. Xebate de rewşa domananê kêna hîna zehmet bî. Tacîz, destdergê û heqaret bi înan ameyêne kerdiş. Mi çi bivatêne keyeyê mi bawer nêkerdêne. Ganî na rewşe raşte ra bêra wedaritiş. Tutî zuran nêkenê. tutê kêna yê karker hetê fîzîkî ra zaf yenê îstîsmarkerdiş. Bi hezaran yê ke nêwazenê qala rewşa xo bikerê est ê.” 

 

Têkoşînê xo da 

 

Şukrane da zanayîş ke serra 2011î de ameya Ceyhan û wina peynî kerd: “Ma dikanêk deştişî akerd. La tedaya dewlete tîya de zî pey ma nêverda. Hewte de reyêk eştêne serê keyeyê ma. Mi hîrê serran karê deştişî kerd. Hêriş û tacîzan vera mi dikan girewt. Ma reyna şîyê Stenbol. Vera heme tedayan ez serê payan de menda. No yew serrî yo ke zî ez meslekê xo kena. Nêweşxaneyêk taybet de sey hemşîre xebetîyena. Sektorê weşye zaf girano. 12 saetan xebetnenê. Mabenê areyîye nîm saeto. Ê çayî 15 deqeyo. Ma nêeşkenê nêweşxane ra bivejî teber. Mudaxaleyê mabenê ma zî kenê. Nêweşxane bîyo sey mezbahaneyan. Ganî nêweşxaneyê taybet bêrê kontrolkerdiş. No sistem seba qedênayîşê cuya merdiman o. Hewte de 5 rojan nobete tepiştena. Kesê ke tena seba kîra xebetîyenê, est ê. La nêeşkenê îdareyê xo bikerî. Ganî têkoşîn hîna xurt bo. Ma do sey her tim emserr zî bi sloganê cuya seyyewbînan û edaletî raşteyê 1ê Gulane de bî. Waştişê mi başkerdişê sektorê weşîye yo.”