WAN - Cinîyan derheqê tepiştişê Makbule Ozere de ercnayîş kerd û reaksîyonê xo ardî ziwan û vatî: “Wa Makbule Ozere bêra tehlîyekerdiş. Heqê cuye çin o.” 

 

Makbule Ozere 9ê Gulana 2022yî de qezaya Artemêtî ya Wanî de bi îdiayê ‘hetkarîya rêxistine’ ameye tepiştiş. Makbuleya 82 serrî problemê weşîye vera 7ê Êlula 2022yî de serbest ameye verdayîş. Raporê Dezgehê Tibê Edlî (ATK) ke ame şirawitiş hetê Wezarîya Edaletî ra ame cigêrayîşkeriş. Dimayê qerarê ATKyî Makbuleye rojanê verênan de ameye tepiştiş û şirawîyaye zîndanê Tîpê Tyî yê Wanî.

 

‘No qerar polîtîk o’ 

 

Rayîrbera Komeleya Heqanê Merdiman (ÎHD) ya Wanî Ayten Kirane derheqê babete de qisey kerd û vat tepiştişê Makbule Ozere vera heqê merdiman o û ATK sey dezgehêk dewlete taşeronîya dewlete keno. Aytene wina dewam kerd: “Makbule Ozere 82 serrî ya û se ra 61 astendar a. Şertê bîyaye de ganî seba rewşa Makbuleye aşmaneyê astengdarîye biameyêne girewtiş. Lazimîya aye bi ewnîyayîşî est a. La ATK raporê eşkena tepişte bimane dano. Na rewşe nêbena ke bêra qebûlkerdiş. Makbule Ozere keyeyê xo de ameye tepiştiş. Nêşikena bi sereyê xo rayra şêra. Her kes dî. No qerar polîtîk o.” 

 

‘Ma do xîretkerdişî ferz bikerê’ 

 

Aytene bale ant serê rewşa tepişteya nêweşe Hanîfe Aslane û vat: “Eynî rewşe de Hanîfe Aslane est a. 76 serrî ya û tepişte ya. Nêweşa KOAHî ya û nêweşîya tansîyonê berz, şekir û esteyan aye de est a. Bi cehdkerdişê keye û heme dezgehan wezîrîya edaletî klozetêk şirawit. Raporê ATKyî yê ‘başa eşkena tepişte bimana’ veng vejîyeno. Madem başa qey aye rê klozet şirawîya? Klozetê ke şirawitî zî qatê cor ê hucrî de ye. Nêeşkena şêra cor û nêeşkena bi no hawa klozet bişixulna. Endamê DAIŞî bi bahaneyê kal û pîrbîyayîşî serbest ameyê verdayîş. Acaba cinîya 81 serrî pîr nîya? Makbule Ozere tepişteya sîyasî ya. Ganî şexsê Makbule Ozere de heme tepişteyê nêweş û kal-pîr serbest bêrê verdayîş.”

 

‘Makbule Ozere 82 serrî ya û se ra 61 astengdara’ 

 

Hemsereka DEM Partî ya Wanî Gulşen Kurte zî reaksîyon mojna tepiştişê Makbule Ozere û wina vat: “Makbule Ozere 82 serrî û se ra 61 astengdar a. ATK 4 aşmî verê cû qerarê ‘eşkena tepişte bimana’ da. No qerarêk buhuqûqî yo. No rizîyayîşê sîstem û îqtîdarî mojneno. Bêhuqûqî û tedayê serê kurdan û cinîyê kurdan bi hawayêke sîstematîk dewam keno. Ganî ma vera hêrişan de sere çewt nêkerê û têkoşînê xo dewam bikerê. Ganî ma Makbule Ozere tena nêverdê.” 

 

‘Tepiştişê Makbuleye bêhuqûqîyo’ 

 

Merkeze Heqanê Cinîyan ê Baroyê Wanî ra Hulya Çelîk Sonmeze ard ziwan ke tepiştişê Makbule Ozere caardişê tebere merdimîyeyo û vat ke no ne ewil û ne zî oeynî yo. Hulyaye wina ercnayîş kerd: “2018î de bi îdîayê ‘hetkarîya rêxistine’ dewa Makbule Ozere rê ameye akerdiş û na çarçewa de 2 serr û 6 aşmî ceza ci rê ameye birnayîş. Makbuleye 2022yî de ameye tepiştiş. Ma qala merdimêke 82 serrî û astengdar kenê. Nêweşxane ra raporê astengdarî ameyo girewtiş. Ma vînenê ke bi raporê ATKyî no rapor nîno dîyîş. Tepiştişê Makbuleye bêhuqûqîyo. ATK wexto ke rapor dano goreyê çi dano. Tîya de heqê cuya merdimî babeta vatişî ya. Sûcdar bibo zî ganî heqê cuye verê çiman de bêro girewtiş.” 

 

‘Heqê cuye heqêk ke îstîsnayê ci çin o’ 

 

Hulyaye qiseykerdişê xo yê peyênan de wina vat: “Welatêk huqûqî de ganî raybazê huqûqî pê bêrê. Heqê cuya merdimi babaeta vatişî ya. Bi lezkî raporê bêhuqûqîye yeno dayîş. Heqê cuye heqêk ke îstînayê ci çinîyo ya. No qeraro ke ameyo dayîş şaş o. Ganî bi lezkî no qerar bêro tepîya girewtiş û Makbule Ozere bi lezkî bêra tehlîyekerdiş.”