Nazlican Nujîn Yildiz

 

ÎZMÎR- Endama Têgêrayîşê Unîversîteya Azade Fatmanur Guçluye da zanayîş ke 17ê Nîsane de kesê ke xo sey MÎTî dayê naskerdiş aye tehîd kerdê û vat ke aye do sey cinîya ciwane vera tedayan bi têkoşînê rêxistinkerdeyî cewab bida. 

 

Tirkîya û Kurdistan de ciwanî bi destbendkerdiş, tepiştiş û tedaye hewl dîyeno bêrê bêvengkerdiş. Bi taybetî zî cinîyê ciwanî yê unîversîteye û ciwanî bi hawayêkê sîstematîk benê hedef û hetê kesê ke xo sey MÎTî danê naskerdiş yenê tehdîdkerdiş. Endama Têgêrayîşê Unîversîteya Azade Fatmanur Guçluye zî demêk nizdî de bi eynî caardişî reyde ameye rî bi rî. Fatmanure da zanayîş ke bi taybetî cinîyê ciwanî hedef yenê girewtiş û vat ke do vera tedayan de têkoşîn bikera. 

 

Bi keye û cuya xo ameye tehdîdkerdiş 

 

Fatmanure dîyar kerd ke 17ê Nîsane de ver keyeyê aye de 5 kesî aye pawitine û nê kesan xo sey endamê MÎTî dayê naskerdiş û vat: “Waştî qisey bikerê la mi nêwaşt. Dima ra derheqê mi de malumat dayê. Derheqê mekteb, keyeyê mi, kam ca ra ya, deynê mi çiqas o de malumat dayî. Mi bi israr nêwaşt ke qisey bikera. Bi vatişê ‘ma sey polîsan nîyê, ma nêvanê meşo çalakîyan ma vanê rêxistin problem o’ û bi vatişê ‘keyeyê to est o, wa hîsin nêbê. Ameyoxê to baş o, wa ameyoxê to de çîyêk nêro sereyê to, way û birayê te est ê dikkat bike’ tehdîd kerdê.”

 

 ‘Bi taybetî hêrişê cinîyan kenê’ 

 

Fatmanure vat ke bi taybetî cinîyê ciwanî yenê hedefgirewtiş û wina dewam kerd: “Cinî hem vera sîstemî de û hem zî vera serdestîya camêrdî de têkoşîn kena. Coka ra bi taybetî hêrişê ciwanan kenê. Têkoşînê cinîyan ra tersenê. Ma do vera nê caardişan de bi rêxistin û xoverdayîşê xo cewab bidê.”

 

 ‘Pere pêşnîyaz kenê’ 

 

Fatmanure da zanayîş ke kesê ke xo sey endamê MÎTî dayê naskerdiş pere pêşnîyazê aye kerdî û qiseykerdişê xo yê peyênan de vat ke her kes hetê ekonomîye de zehmetîyan anceno û peynî kerd: “Welat de krîzêk pîl est o. Nê kesê na rewşe sey firsend vînenê û pere, kar pêşnîyazîyê ma kenê. La ma bi têkoşînî eşkenê vernîya înan bigîrê. Ganî ciwan sere çewt nêkerê. Ma do bi xoverdayîşê xo yê rêxistinkerde cewab bidê înan.”