Mîdye Miqted

 

HELEB - Cinîyê Helebî ziwanê kurdkî musenê û nê wareyî de xo aver benê. Cinîyan dîyar kerd ke Şorişê Rojawanî reyde îmkanê wendişê bi ziwanê kurdkî virazîyayê û wina vatî: "Ziwanê ma nasneme û bîyayîşê ma yo. Ma do her tim ziwanê kurdkî rê wayîr vekîyê."

 

Tarîx ra heta nika hêrişêk sîstematîk her hetê Kurdistanî ra hemverê ziwanê kurdkî pê ameyo û hema zî dewam keno. Hemverê nê hêrişan de zî têkoşînê şarê kurdî tarîx ra heta roja ma ya ewro dewam kena. Rojawanê Kurdistanî de zî bi taybetî dimayê Şorişê Rojawanî de kar û xebatî û wayîrvejîyayîşê seba ziwanê kurdî aver şi. Taxanê Eşrefiyê û Şêx Meqsûdî yê bajarê Helebî dimayê Şorişê Rojawanî ke xo reyde şorişê ziwanî ard, îmkanê pîlî ameyî bidestkerdiş ke şarê kurdî wayîrê tarîx, kultur, nasnema û ziwanê xo vejîyê. Heleb de zî cinî û ciwanî ziwanê kurdkî musenê. Komîngeh û meclisan de hewte de di rey dersê musnayîşê bi ziwanê kurdkî est ê. Bi taybetî cinîyê emrê înan pîl zî ziwanê xo musenê û xeylêk şanaz û serberz ê. 

 

Cinîyê ke bi musayîşê ziwanê kurdkî serberz ê wina vatî: "Ziwanê ma bîyayîşê ma yo. Seba ma xeyalêk bî ke ma bi ziwanê xo biwanê. Ewro zî ma xeylêk serberz ê bi ziwanê xo musenê."

 

'Seba adetê keyeyî, ma wendişê xo nêkerd'

 

Aytan Reşo da zanayîş ke înan seba adetê keyeyî nêwendê û wina vat: "Ma hewte de di rey derbazê komîngehî benê û ziwanê kurdkî musenê. Wexto ke ma qij bî, seba adetê keyeyî dayîk û pîyê ma qedexe kerdibî ke sey kêna heqê ma yê wendişî bibo. Tim vatêne şerm o ke kênayî şêrê mekteb. No zî verda ke heta emrê ma yê nika no  mereq ma reyde bimano."

 

'Şorişê Rojawanî reyde îmkanê wendişî virazîya'

 

Aytane da zanayîş ke xêrê Şorişê Rojawanî reyde cinî tewr wayîrê nasnemeyê xo vejîyê û wina vat: "Çîyê ke verda bî sînorê şerm û qedexebîyayîşî bişikinê, wayîrê xo vejîyê Şorişê Rojawanî bî. Bi xêrê Şorişê Rojawanî ma kultur û nasnameyê xo pawit û ma wayîrê ziwanê xo vejîyê. Ewro zî seba ma xeylêk îmkanî ameyê awankerdiş da ke ma bi ziwanê xo bimusê. Seba ke bîyayîşê ma bi bîyayîşê ziwanê ma girêdaye yo. Coka ma bi moral û eşqêk pîl verê xo danê musayîşê ziwanê kurdkî."

 

'52 serrîya mi nêbî asteng ke ez ziwanê xo bimusî'

 

Aytane dewamê qiseykerdişê xo de eşkera kerd ke emrê aye pîl nêbîyo asteng ke ziwanê kurdkî bimusa û wina vat: "Emrê mi 52 serrî yo labelê pîlbîyayîşê emrê mi nêbî asteng ke ewro ez nêeşkî ziwanê xo bimusê. Pêwa emrê ma yê pîlî heskerdiş û meraqê ma yê musayîşî ziwanê kurdkî tewr pîl beno û ma netîceyê pîlî gênê."

 

'Bîyayîşê ma bi ziwanê ma girêdaye yo'

 

Sebah Dilo destpêk de da zanayîş ke averşîyayîşê înan bi rayîrê musayîşê înan ê bi ziwanê kurdkî bo û wina vat: "Bîyayîşê ma bi ziwanê kurdkî bo û wina vat: "Bîyayîşê ma bi ziwanê ma rê girêdaye yo.  Demêk o ma derbazê Komîngeha Pakrewan Gulê Selmo benê û ziwanê xo yê kurdkî musenê. Nê ra zêdeyêr ma hewl danê û wazenê ke ma xo bi rayîrê ziwanê xo aver berê. Seba ke wexto ke mi dîne embazê mi bi ziwanê xo zano binuso û biwano la ez zî nêzana, xeylêk zorê mi şîne coka mi xeylêk israr kerd ke ez ziwanê xo bimusî. Mi israrê xo ca ard, ma xeylêk bi mereq ê seba ma nê ra zêdeyêr biwanê û xo aver berê."

 

'Ma bi ziwanê xo serberz ê'

 

Ferîde Mihemeda 46 serrî hîsê xo yê şanazî yê ji seba musayîşê ziwanê kurdkî ard ziwan û wina vat: "Ewro ez sey dayîkêke ziwanê kurdkî musaya. Demê ma yê verê de qedexe bî ke ma ziwanê xo qisey bikerê la wextê ma yê nika de ma bi ziwanê xo asanî  bi eşq û heskerdişêk pîl musenê. Ma bi ziwanê xo qisey kenê û nusenê. Ewro ma xeylêk keyfweş ê û serberz ê ke ma bi ziwanê xo wanenê.”