Gulîstan Gulmuş

 

AMED - Avûkate Zelal Karabulak derheqê rewşa tepişteya bi nameyê Adîle Husseîn ya Dîlok de zîndan de tute ard dinya, qisey kerd û vat: “Wezîfedarê hukmî yê Tirkîya tîya bi dişminî huqûqê ceza pê ano.”

 

Adîle Husseîn Dîlok de amebî destbendkerdiş û bi îdiayê endamîya rêxistine tepişnayî û berdî zîndanê Tîpê Lyê Dîlokî. Adîleye 11ê êlule de ameye tepiştiş û 5 rojî badê cû tuta xo arde dinya. Ame zanayîş ke wexto ke Adîle tute arda dinya koxuşa yew kesî de bîya. Muracatê seba tahliyeyê aye ame kerdiş zî ameyî redkerdiş. Adîle 17ê êlule de şirawitî zîndanê cinîyan ê Amedî.

 

Endama OHDyî avûkate Zelal Karabulak derheqê rewşa Adîleye de qisey kerd. Zelale vat, Adîle 13ê tebaxa 2024ine de sereştişê keyeyî de ameya destbendkerdiş û wina vat: “Adîle hema prosesê 18 serrî nîya. 9 aşmî digane bîya. Erşawitê zîndanê Dîlokî. 5ê êlule de tuta xo arda dinya û erşawenê nêweşxane. Gonî vînî kerdibî. Bedenê aye masa bî. Bi na rewşe sewqê zîndanê cinîyan ê Amedî kenê. Na rewşe de sewqkerdiş ca de nîyo. Heyetêk OHD, ÎHD û komîsyonê zîndanan pê ameyîne şî pêvînayîş. Kurdkîya aye zî tirkîya aye zî baş nêbî. Ma fam nêkerdêne, seba nê tay endîşeyîne bî.”

 

‘Bi bahaneyê cîya red kerdê’

 

Zelale wina dewam kerd: “Roja Adîle ameya tepiştiş, mêrdeyê xo dir pêvînayîş nêkerda. Keyeyî dir pêvînayîşêk nêkerda. Dayîk û babî yê xo şerê Sûrîye de vînî kerda. Mêrdeyê xo dir marayê dînî zewiciya ya. Adîle tirkî nêzana. Seba nê nêeşkena waştişê xo neql bikera. Waştişê aye bi sebebê kêmî yena redkerdiş. 16 serrî de tuta xo ya ewilî ana dinya. A zî yew serrî ya. La hema tuta xo zî nêdîya.”

 

Ganî ma bibê vengê tepişteyan

 

Zelale wina qedêna: “Zîndan de problemê ekonomî yenê ciwîyayîş. No seba tute problemê weşîye akeno. Adîle tuta xo dir amebî pêvînayîş. Tute seba werteyê nêhîjyenîk nêweş kewtebî. Adîle babeta ekonomî de probleman ciwîyena. Pêwa muracatan nêameya tahliyekerdiş. Endamîya rêxistine ra ameya tepiştiş. Ganî ma bibê vengê tepişteyan. Ma rêxistinê cinîyan bibê vengê tepişteyan.”