Gulîstan Gulmuş 

 

COLEMÊRG - Zîndanan de boykotkerdişê dadgehan û protestokerdişê pêvînayîşê bi telefon û keyeyî yê bi waştişê “Abdullah Ocalanî rê azadî û meseleya kurdî rê çareserîya sîyasî ” zîndanan de dewam kenê, cinîyan dîyar kerdî ke ganî çalakî hetê şarê kurdî ra bêrê hîrakerdiş û vatî, “Çar parçeyê Kurdistanî de ganî sere de dayîkî, pêro kurdî destê xo bidê yewbînan û dorê serekê xo de bibê xelek."

 

Çalakîyê tepişteyê sîyasî yê zîndananê Kurdistanî û Tirkîya ke 27ê Teşrîna Peyêne 2023ine de bi waştişê azadîya fîzîkî ya Rayberê PKKyî Abdullah Ocalanî û seba problemê kurdî çareserîya sîyasî dest pêkerdibî, dewam kenê. Tepişteyê ke yewin rey çalakîya xo bi grevê vêşanîye yê dore organîze kerdî, 4ê Nîsane û nata çalakîya xo vurnayî qonaxêk newe. Tepişteyî nêzdîyê 3 aşmî yo zîndanan de dadgehan boykot kenê û telefonê keyeyê xo nêkenê û keyeyê xo reyde pêvînayîş nêkenê. 

 

Cinîyê Colemêrgî derheqê tecrîd û xoverdayîşî de qisey kerdî.

 

'Serekê ma, ma bi dinya da naskerdiş'

 

Zekîye Yilmaz, dîyar kerd ganî şarê kurdî dewaya xo bipawo û wina vat: “Serekê ma destê înan de yo. Vanê ke 'tanq û topê ma est ê, kurdî esîrê ma yê'. Serekê ma, ma bi dinya da naskerdiş. Ma do fek serekê xo ra vera nêdê. Ma do heta dilopê gonîya xo ya peyîn hemverê nê caardişan xo ver bidê. Wa şarê ma wurzo serê lingan û paştdayîş bido na dewa. Wa êdî no zulm peynî bibo."

 

'Nê cayan kerdî qereqol û zîndan'

 

Emîne Alkiş tecrîdê mutleqî yê serê Abdullah Ocalanî ard vîr û wina vat: “3 serrî yo kes nêeşkeno Rayberê ma reyde bikewo têkilî. Ma wazenê ci ra xebere bigîrê. Dayîkê çar parçeyê Kurdistanî, bêrê ma destê xo bidê yewbînan û dewaya xo serekê xo rê bibê xelek. Semedo ke ma dayîk ê û aştîye wazenê. Ma semedê ziwan û nasnameyê xo têkoşîn kenê. Tîya cayê kurdan o. Nê cayan kerdî qereqol û zîndan. Ganî dayîkî kîşte dayîkê tepişteyan bê û têkoşîn dewam bikerê."

 

'50 rojî yo nêvejîyenê pêvînayîş'

 

Asiye Tay zî wina vat: “50 rojî yo tepişteyê ma nê vejîyenê pêvînayîş û ne zî telefon de qisey kenê. Ma venga pêro dayîkê dinya kenê ke peynîyê tecrîdê serê tepişteyanê ma bîyarê. Ma zî dayîk ê û zerrîya ma veşena. Ganî pêro dayîkî destê xo bidê yewbînan û tepişteyan bipawê. Ma aştî û têduştî wazenê. Merdimî semedo ke biciwîyê, semedo ke bimirê nêanê dinya.”

 

'Berpirsîyarîyê tewr pîl keweno serê milê cinîyan'

 

Züleyha Çalman zî wina qedêna: “Helbet tecrîdo ke ewro serê Rayberê ma de yeno kerdiş, serê temamê komelê kurdî û şarê Rojhelatê Mîyanên zî yeno kerdiş. Berpirsiyarîyê tewr pîlî keweno serê milê ma cinîyan. Semedo ke Prometheusî ma yo ke ma ancî awan kerd, nika binê tecrîdî de yo. Nê semed ra ganî ma ey bipawê. Ganî her kurdêke hesasiyet ramojno û verê xo bido zîndanan. Tenê bi nê rengî ma eşkenê xoverdayîşê zindanan xurt bikerê. Xêrcê xoverdayîşî tu çareserî çin a."