Elfazî Toral

 

STENBOL - Femîniste Eftelya Koyuncu, bale ant serê tesîrê sîstemê hemserekî û projeyê şaredarîyê DEM Partî û vat: "Pêvînayîşê ma yê hemşaredar û sîyasetmedaranê cinîyan reyde reyke bîn mojna ma ke paştdayîş çiqas muhîm o. La ganî êdî hemverê faşîzmî û polîtîkaya dişminîyê cinîyan keno, têkoşînêk hempar bêro kerdiş.”

 

8 û 9ê Hezîrane de komêk femînistî Amed û Êlih de bi serkêşîya Têgêrayîşê Cinîyê Azade (TJA) pêvînayîşêk kerd. Cinîyan tecrûbeyê xo pare kerd û têkoşînê hempar sero vindertî.

 

Têkoşera Pawitişê Cinî, wendekara beşê têkilîyê Mîyanneteweyî û zanistê fehmî yê Unîversîteya Bogazîçî Eftelya Koyuncu, bale ant têkoşînê têgêrayîşê cinîyanê kurdan sero û xizmetê şaredarîyê DEM Partî yê seba cinîyan yenê kerdiş.

 

Destûrê reglî...

 

Eftelya, dîyar kerd ke destûrê reglî semedê cinîyê ke şuxilênê muhîm o û vat: "Regl cuye de rastîyêk o. La bi destê îqtîdarî û zîhnîyetê kehnî regl yeno nimitiş û sey şerm yeno vînayîş. Destûrê reglî na rewşe de muhîm o. Cinî wareyê karî de nêwazenê bêrê astengkerdiş û wazenê mîyanê asayîşî de bişuxilîyê. Destûrê reglî ke hetê şaredarîyê DEM Partî ra yeno averberdiş, semedê cinîyan muhîm o û eynî wextî de caardişê destûrê 8ê Adare, 25ê Teşrîna Peyêne zî muhîm o.”

 

Tesîrê sîstemê hemserekî

 

Eftelya, dîyar kerd ke tewrbîyayîşê cinîyan ê sîyasetî, bîyayîşê cinîyan ê raşteyê îstîmlakî ke bi şaredarîyê DEM Partî yenê kerdiş muhîm o û wina vat: "DEM Partî sîstemê hemserekî ard. Nê sîstemî reyde cinîyê ke çin ameyîne hesibnayîş, mîyanê 4 dêsan de ameyî hepskerdiş, hişmedîyê şaredarî tenê cayê camêrdan o ame averberdiş, werte ra rawuşt. No sîstem mojna ke cinî eşkenê sîyaset de ca bigîrê." 

 

'Ma pîlkerdişê têkoşînî de qerardar ê'

 

Eftelya, tewr peyîn qiseykerdişê xo de bale ant serê pêvînayîşê femînistan ê Amed û Êlihî û wina qedêna: "Sîyasetmedarî, hemşaredarî, hemserekî, aktîvîstê TJAyî femînistan reyde pêvînayîş kerdî. Pêvînayîşan de cinîyan bale ant serê muhîmîyê pêvînayîşî. Dewlete-camêrd bi her hawayî hêriş bena têkoşînê cinîyan ser. Êdî tenê paştdayîş nê hemverê polîtîkayê ke dişminîyê cinîyan kenê de  têkoşînêk hempar bêro kerdiş. Ma pîlkerdişê têkoşînî de qerardar ê.”