Melek Avci

 

ANQARA - Qirkerdişê Garî kewt 9 serrîya xo. Elîf Ozdemîra ke a roje ware de bî û birîndar bî, waştişê aştî newe ra ancî kerd û vat: “Ez bi endîşeyîn bîya la a roje şîya. Semedo ke ganî ti tena aştîye nêfikrîyê, ganî ti pê zî bîyarê. Eke merdimî bawer bikerê ganî hetê aştîye de bê.”

 

10ê teşrîna verêne 2015ine de Garê Anqarayî de ‘Mîtingê Kede, Aştî û Demokrasî’ ê bi sloganê "Hemverê şerî de nika aştî" ame organîzekerdiş. Netîceya hêrişê DAÎŞî yê hemverê bi hezaran kesî de cinî zî mîyan de 103 kesî dinyaya xo bedelnayî.  20 ci ra tutî, 391 kesî birîndar bîyî. Qirkerdiş, 9 serrê xo pirr kerd. La yew wezîfedarêk selahîyetî nêame muhakemekerdiş û roniştişê 1ê Temmuze yê dewa de seba şikdaran "sûcê hemverê merdimayî" qerarê beratî ame dayîş. Elîf Ozdemîr ke a roje kênaya xo dir amebî ware û xeylêk embazê aye ameyî qetilkerdiş, 9 serrî dima zî waştişê aştîye ancî kena.

 

‘Ez endîşeyîne bîya la ancî şîya’

 

Elîfe wina vat: “Bi serran o tewrê mîtîngan bena. Reya ewilî nokteyê polîsan çin bî. Polîsî kêm bî. Mi kênaya xo ra zî vat, polîsî kêm ê. Seba asayîşî ganî polîsan barîkat awan bikerdêne. Qet cigêrayîş nêvirazîya. Ma wina bi rehetî kewtî zerre. Enerjîyêk zaf weş est bî. Wexto ke kortej ameyîne awankerdiş, bomba teqîyayî. Zerrîya min de çîyêk est bî. Mi çîyêk winasî pawitêne. Îqtîdar seba hêzê xo berz bikero, Pirsûs de qirkerdiş pe ard. Endîşeyê mi seba şîyayîşî est bî la ez şîya. Semedo ke ganî merdim seba aştîye endîşeyîn nêbo.”

 

‘Qirkerdiş bi destê dewlete ame kerdiş’

 

Elîfe dewam de wina vat: “Xeylêk delîlî est bî. La dadgehe nê çî nêerjna. Uca de bomba teqîyayî. Merdimî ameyî qetilkerdiş, ma birîndar bîyî. La polîsî çin bî. Di bombayî pê ser teqîyayî. Bi endîşeyê ke do hîrêne zî biteqo, her kes qîra. La polîsan zanayîne ke dimayê bombaya diyîne, sewbîna çin a. Dadgehan vat, ‘sûcê hemverê merdimayî çin o’ û dosya padayî. Ma şerêke cîranan nêciwîyayî. Na dewayêke şexsî nêbî. No husumet nêbî. No çîyêk ke rêxistinêk plankerde bî. No sûcê hemverê merdimayî yo. Çîyêk eynî zîhniyetî ra yeno est o. Îqtîdar talîmatan dano, dadgehe pê ana.”

 

‘Ganî ma hetê aştîye de bê’

 

Elîfe tewr peyîn wina vat: “9 serrî derbaz bibo zî her çî sankî vizêr pê ameyo. Heta no sîstem nêvuryo, no îqtîdaro faşîst nêşino, do nê qirkerdişî dewam bikerê. Qirkerdişê 10ê teşrîna verêne, qirkerdişê komelî, sûcê merdimayî yo. Pêwa her çî ganî ma têhet de bê. Ganî ma hetê aştîye de bê û pîya rayîr ra şêrê.”