AMED - Bultenê Tecrîdî ke hetê OHDyî ra ameyo amadekerdiş de, ame dîyarkerdiş ke 24 serrî û 7 aşmî û 28 rojî yo Îmraliyî de tecrîd yeno caardiş.

 

Hûmara 9ine ê "Bultenê Tecrîdî" ke 15 rojan reyke hetê Komeleya Huqûqnasê Seba Azadîye (OHD) ra yeno amadekerdiş, vejîya. Bulten de ame dîyarkerdiş ke Rayberê PKKyî Abdullah Ocalanî û tepişteyanî bînan Hamîlî Yildirim, Veysî Aktaş û Omer Hayrî Konar yê ke Zîndanê Tîpê Fyê Asayîşê Berzî yê Îmraliyî 3 serrî û 6 aşmî û 17 rojî yo tu agahî nîna girewtiş.

 

Bulten de ame dîyarkerdiş ke Îmrali rê 24 serrî 7 aşmî û 28 rojî yo tecrîd yeno caardiş, 4 serrî û 7 aşmî û 10 rojî yo keyeyî nêeşkenê pêvînayîş bikerê, 5 serrî 2 aşmî û 16 rojî yo avûkatî zî nêeşkenê pêvînayîş bikerê. Bulten de ca dayî eşkerayîya OHDyî û bi seyan avûkatan ê verê Dadgeha Destûrê Bingehîn (AYM). OHDyî venga Dadgeha Destûrê Bingehîn kerdibî ke peynîya binpaykerdişê heqan ê sîstematîk û giran yê Îmraliyî bîyaro.