Elfazî Toral

 

STENBOL - Înîsîyatîfê Dayîkê Aştîye ra Sabîha Bozan, dîyar kerd ke çarçewaya kampanyaya "Semedê aştîye destê xo derg bike" xeylêk derûdoran dir pêvînayîş kenê û vat: "Ma vengdayîşê destekî her kesî ra kenê û ma waştişê caardişê aştîye de biisrar ê.”

 

Înîsîyatîfê Dayikê Aştîye yê Stenbolî çarçewaya kampanyaya ke aşmê vîyarte de bi sloganê "Semedê aştîye destê xo derg bikerê" da destpêkerdiş, xebatanê xo dewam kenê. Pêro hetî serdemo ke şîdet, qirkerdiş û şer ci de xidar o, bi vengdayîşê têkoşînê hemparî mesajê ke hawirdorêk aştiyane lazim o danê.

 

Înîsîyatîfê Dayîkê Aştîye Sabîha Bozan, ajansê ma yê JINNEWSî rê qisey kerd.

 

'Waştişê ma cuyêka azad a'

 

Sabîha Bozan, bale ant serê tedayî û vat: "Biserran o herra ma ser o polîtîkaya qirkerdişî û talanî yena kerdiş. Ma sey dayîkî nê semedî ra xeylê dejenê. Leşkerî yenê kiştiş, gerîlla yenê kiştiş, dewijî yenê kiştiş. Ez venga pêro dayîkanê nê welatî kena, ma bibê yew. Şer çîyêk xirab û tarî yo. Vernîya her çî; cinî, dayîk, tutî, ciwan û extiyarî zirarêk pîl vînenê. Wexto ke cenaze yena, ma nêpersenê cenazeya kamî ya. No semedê ma problemêk nîyo. Semedo ke hêsrê pêro dayîkan yew ê. Ma pêro dayîkan sey xo vînenê. Na herre qîmê ma hemine kena. Waştişê ma tena cuyêka aştîyane, azad û têduştî ya.”

 

'Şer tesîrê temamê şaran keno’

 

Sabîha Bozan dewam de wina vat: "Ma her tim semedê aştîye destê xo derg kerd, la destê ma timî hewa de mend. Ma bi sloganê "Destê xo aştî rê derg bike’ kampanya da destpêkerdiş. Nuştox, hunermend, sîyasetmedar, pawitoxê heqê merdiman sere de ma her kesî dir têkilî da ro. Ma şî serdayîşê ÎHD, temsîlkarê Koma Aştîye, nuştox Îhsan Elîaçik, Partîya Deva. Do serdayîşê ma dewam bikerê. Semedo ke aştî bêro, ma do pêvînayîşê xo dewam bikerê. Ma êdî şer nêwazenê. Ma destek wazenê. Şer tesîr pêro şaran ser o keno.”

 

'Ma waştişê caardişê aştîye de biisrar ê'

 

Endama Înîsîyatîfê Dayîkê Aştîye Sabîha Bozan, tewr peyîn wina vat: "Ma dayîkî vanê êdi bes o. Ma şer nêwazenê. Çi hewce bikero, ma do bikerê. Hewce bikero ma wazenê serekkomarî dir zî pêvînayîş bikerê. Wa tena qetilkerdiş û şer peynî bibo. Qetilkerdişê cinîyan zî girêdayeyê şerî yo. Kerdoxî  bêcezaverdayîşî yenê xelatkerdiş. Ma qetilkerdişê cinîyan qebûl nêkenê. Ganî cezaya tewr giran bidê kiştoxê cinîyan. Ma reyke bîn veng danê ke dayîkan tena meverdê û ma waştişê aştîye de biisrar ê.”