Rabîa Onver

 

WAN - Parlamentera DEM Partîye ya Şirnexî Newroz Uysal dîyar kerd ke tayînkerdişê qeyûmî hêrişê hemverê îradeyê şarî yo û ard ziwan ke hemverê destbendkerdişan û îşkenceyî têkoşînê huqûqî dayê destpêkerdiş.

 

11ê sibate de hetê 5ine Dadgeha Cezaya Giran ya Amedî ra hemşaredarê Bajarê Pîlî yê Wanî Abdullah Zeydanî rê 3 serrî û 9 aşmî ceza ameye birnayîş. Badê nê şarî verê awanîya şaredarî de nobete dayî destpêkerdiş. 15ê sibate de qeyûm tayînê şardarî ame kerdiş. Parlamentera Partîya Têduştî û Demokrasî (DEM Partî) ya Şirnexî Newroz Uysal derheqê prosesê tayînkerdişê qeyûmî dir ercnayîş kerd.

 

‘Hîrê serdem o ke qeyûm tayînê îradeyê şarê kurdî yeno kerdiş’

 

Newroz Uysal da zanayîş ke hîrê serdem o qeyûmî tayînê şaredarîyê bajarê Kurdistanî benê û vat: “Wan de verê zî mazbata nêame dayîş. Xoverdayîşê şarî rî da û semedê nê reya diyîne bi sebebê cîya hewl dayî ke qeyûm tayîn bikerê. Plansazgehê reaksîyono ke  do bajarî ra vejîyo werte kerdî û derheqê nê de amadekarî kerdî.”

 

‘Metodê îşkenceyî û çîyê ke ameyî ciwîyayîş provakasyon bî’

 

Newroz Uysal vat, îşkenceyo ke wextê destbendkerdişam de ame kerdiş hetê STK û huqûqnasan ra raporê ci ameyo amadekerdiş û vat: “Dewlete bi qerarê qeyûmî îradeyê şarî xesp kerd. Hêzê asayîşî uca bica kerd û bi metodê îşkenceyî hewl dayî ke şarî bêveng bikerê. Pêwa nê şarê Wanî îradeyê xo dayo werte û lingan ser o. Roja ewilî ra îşkenceyo ke ame kerdiş, ame neqlkerdiş la bêvengîyêk vera nê ame awankerdiş. Hemserekê ma persayî û vatî, no provakasyon o, 15ê sibate bi zanebîyayîş ame weçînayîş? Bi nê çi yeno hedefkerdiş werte de yo.”

 

‘Hemverê têkoşîn û xoverdayîşî hêriş’

 

Newroz Uysal dewam de wina vat: “Ma eşkenê vajê ke no tewir îşkence bi taybetî îşkenceyê cinîyan ser o. Rojê vîyarte de Neslihan Şedal ke bi sebebê destbendkerdişî rastê îşkence amebî. Ekîbê ke ameyî tîya bi temamî semedê îşkence û muameleyê xirab bî. Uca bi zanebîyayîş hêriş ma ser o ame kerdiş, çi ciwan, tutî, cinî, kam ci partî ra ameyê weçînayîş, pêwa ke zanayîne ma parlamenter ê. Ma reyke ra zêdeyêr rastê şîdetê polîsan ameyî. Helbet hêrişê hemverê dişminî şexsê mi nîyo. No hemverê pêro şarê kurdî, cinîyan, têkoşîn û xoverdayîşê rêxistinkerde yo.”

 

‘Ma bi xurtkerdişê rêxistinbîyayîşî proses pêşwazî kenê’

 

Newroz Uysal wina qedêna: “Ma hemverê îşkenceyan de muracatê huqûqî kerd. Derheqê îşkenceyan de heta nika tu cayêk ra eşkerayîyêke nêame. Bêvengîya hemverê nê nîşaneyê îşkence yo. Ma hemverê prosesî bi xurtkerdişê têkoşînê cinî proses pêşwazî kenê.”