Rozerîn Gultekîn

 

STENBOL - Wendekarê unîversîteya Stenbolî ke hemverê tepiştişê şaredarê ÎBB’yî Ekrem Îmamoglu û betalkerdişê dîplomeya ey dest bi boykotkerdişê dersan kerdî, dîyar kerdî ke ê ziwanê faşîstî qebûl nêkenê û wina vatî: “Wan ra heta Şîşlî, ma pêro tayînkerdişê qeyûman de vînenê. Bi hêrişê hemverê şarî wazenê cebê xo pirr bikerê.  

 

Hemverê tepiştişê şaredarê bajarê pîlî yê Stenbolî Ekrem Îmamoglu û betalkerdişê dîplomeya ey xeylêk unîversîteyan de çalakî ameyî destpêkerdiş û 19ê adare ra çalakî dewam kenê. Unîversîteya Teknîkî ya Ortadogu (ODTU), Unîvesîta Anqarayî, Unîversîta Bîlkentî, Unîversîta Yildirim Beyazit a Anqarayî, Unîversîta Stenbolî, Unîversîta Mîmar Sînan a Guzel Sanatlarî, Bogazîçî, Galatasaray, Yildiz Teknîk, Îstanbul Teknîk, Marmara, Yenîtepe, Kadîr Has, Başkent, Bursa Uludag, Bahçeşehîr, Ege, Dokuz Eylul de wendekaran dest bi boykot kerd û çalakîyanê xo dewam kenê. Wendekarê unîversîta Stenbolî derheqê babete de qisey kerd.

 

Wendekara ke nêwaşt nameyê xo bido wina va: “Hemverê bêtêduştî û zextan ewilî kurdan, badê zî cinî û ciwanan xo ver dayî. Ganî no nêro xovîrrakerdiş. Tayînkerdişê qeyûman dir zext zêde bî. Unîversîteya Stenbolî de her tim xoverdayîş est bî û do bibo. Wendekarî do bêveng nêmanê û qisey bikerê. Wendekarî, cinî, ciwanî, kurdî do serkewte bibê. Ma cinîyanê Fîlîstîn,, Rojawan, Sudan û pêro cinîyê ke xo ver danê, silam kenê.”

 

‘Wazenê cebê xo pirr bikerê’

 

Wendekara unîversîta ke nêwaşt nameyê xo bido,nê çî qalî kerd: “Hemverê hêrişan de têkoşînê unîversîteyan ame destpêkerdiş û şaran rê vila bî. Ma her kesî dawetê xoverdayîşî kenê. Ma merkezê xoverdayîşî de yê. Amancê tepiştişan, tersnayîş o. Ma fek têkoşînê xo ra vera nêdanê. Ma do bi xoverdayîş ser bikewê.”

 

Ciwanî çi wazenê?

 

Wendekara bîne zî nêwaşt nameyê xo bido, wina ercna: “Her wareyî de bêhuqûqî yeno ciwîyayîş. Unîversîte de zî yeno ciwîyayîş. Tayînkerdişê qeyûmî de rektor zî parçeyêk nê bêhuqûqî yo. Rejîmê yew camêrdî dîplomaya unîversîte betal kerd. No hêrişêk hemverê îdarekarî û unîversîta bi xo yo. Semedê rejîmê yew camêrdî, dîploma betal keno, na rewşe tehluke ya. Wazenê demokrasî çin bibo. Ciwanan ra çi wazenê?”