Neslîhan Kardaş

 

QERS - Parlamentera  DEM Partîye Sumeyye Boz polîtîkayê qeyûman ê hukmatî ercna û dîyar kerd ke hukmat hetêk şarî mîyanê feqîrî de verdeno, heto bîn ra zî dewlemendkerdişîê sermayeyê şerî dewam keno û hêzê xo bi nê rengî meşrû mojneno ra. Sumeye wina dewam kerd: “Ma hemverê nê de bi taybetî sere cinî çalakîyê xo yê hemverê qeyûman de dewam bikerê."  

 

Hukmatê AKPyî bi 3 serdem o ke semedê îradeyê şarê herême desteser bikero, qeyûm tayîn keno.  Badê weçînayîşê îdareyê herêmî yê 31ê adara 2024ine reya ewilî Colemêrg de qeyûm ame tayînkerdiş. Tewr peyîn zî Qaxizmanê Qersî ame desteserkerdiş. 

 

Parlamentera Partîya Têduştî û Demokrasî (DEM Partî) ya Mûşî Sumeyye Boz tayînkerdişê qeyûman ercna.

 

'Polîtîkayê qeyûmî tena hemverê şarê kurdan nîyê'

 

Sumeyye Boz wina qal kerd: "Qeyûm hetêk bîn ra zextê kurdan ser o yo labelê ganî ma bale biancê hetêk bîn zî, badê weçînayîşê peynî ma vînenê ke na polîtîkaya qeyûm tena hemverê şarê kurdî nê, hemverê wareyê têkoşînî yê yewbîyaye yên ke kurdan înan dir tifaq viraşto, hêzê xo kerdê yew û mûxalefet xurt kerdê, açaryaya polîtîkaya hêrişî."

 

'Ganî merdim hêrişê pêro hetan ser o bivîno'

 

Sumeyye Boz dîyar kerd ke kurdî û dostê înan, pêro beşê komelî yê ke bi hişmendî ganî awankerdişê bajarêk de pêro cîyayî bêrê têhet têgêrayê, bîyê hedef. Sumeyye Boz vat: "Hêrişê hemverê şaredarîyê rojawanê Tirkîya de, ganî bêro vînayîş ke binê pêro hêrişê hemverê endamê meclîsê şaredarîyan, hemşaredar û HDKyî, hemverê pêro zîhnîyetê ke hemverê fehmê îqtîdarî yewperestî, cinsperestî vejênê, hêrişî est ê."

 

'Semedo ke qeyûm tayîn bikerê metodê cîya awan kenê'

 

Sumeyye Boz, dewam de wina vat: “Wexto ke ma dîyar kenê ke akademîyê edaletî nimûneyêk terefgir ê, ma vînenê ke hukm argumanê îdeolojîyê sîyasî yo. Tirkîya de êdî mimkûn nîyo ke merdim qalê huqûqê xoserî bikero. Semedo ke qanûn û hukm xo rê kerdê amûr û goreyê berjewendîyê xo şuxilnenê. Ma nê çî dewaya kumpasê ya Kobanî de zî vîna. Ma eynî çî semedê hemşaredaran zî vînenê. Dewaya Abdullah Zeydan de zî vejîya werte ke qerar bi sebebê sîyasî ameyê dayîş. Ma eynî rewşe şaredarîya Kaxizmanî de zî vînenê."

 

'Ma do her wareyî de têkoşînê xo dewam bikerê'

 

Sumeyye Boz, dîyar kerd ke dewlete şarî mîyanê feqîrî de verdena û vat: “Ma do hemverê nê de vernê de cinî her wareyî de vengê xo berz bikerê. Semedo ke azadîya komelî û aştîya komelî û hemverê polîtîkayê qeyûmanî her tim cinî refê tewr verên de têkoşîn kenê. 10ê sibate de bi serkêşîya TJAyî hetê cinîyan ra rayîrşîyayîşê azadîye ame organîzekerdiş. Hêrişê hovane yê polîsan zî nîşaneyê bêtehamulî hemverê komelî û bîyayîşê cinî wareyê komelî, meydanî, sîyaset û cuye de yo.”

 

'Hêriş yewbînan ra dûrî nîyê'

 

Tewr peyîn Sumeyye Boz vat: “Îqtîdaro ke vat, 2025 serra keyeyî ya û waşt ke cinîyan keye de hepis bikero, hetêk ra zî hêrişê cinîyê ke têkoşîn kenê, keno. Coka hêrişî yewbînan ra visnaye nîyê. Sere de ciwanî û cinî, ez venga pêrûne dana ke hemverû nê nêzdîbîyayîşê çinhesibnayîşî û înkarkerdişê hemverê polîtîkayê qeyûman bêveng memanê.”