Pelşîn Çetînkaya

 

AMED - Rojê vîyarte de raporê hîrê aşman ê kampanyaya ‘Vatişê ma nêqedîya yo ma do şîdet pîya vindarnê’ rayapêroyî dir ame parekerdiş. Derheqê raporî de Koordînatora Mudirîya Polîtîkayê Cinîyan ê Şaredarîya Peyasî, Gunay Yakut qisey kerd û da zanayîş ke çarçewaya kampanyaye de xo resnayê xeylêk cinîyan û xeylêk cinîyan muracatê înan kerdo. Gunay Yakut vat, do xebatanê xo pêro wareyan de dewam bikerê.

 

Heyetê Cinîyan ê Îdarekarîya Herêmî ya DEM Partîye bi wesîleya 25ê Teşrîna Peyêne Roja Têkoşînê Hemverê Şîdetê Cinîyan ser o 13ê teşrîna peyêne de kampanyaya ‘Vatişê ma nêqedîya yo ma do şîdet pîya vindarnê’ ke do serrêke dewam bikero dayî destpêkerdiş. Hetê şaredarîyê bajarê pîlî û şaredarîyê qezayan ra raporê hîrê aşman ê kampanya rojê vîyarte de rayapêroyî dir ame parekerdiş. Eşkerayîya parekerdişê raporî de eynî wextî de startê bernameyê 8ê Adare Roja Cinîyan ê Dinya zî ame dayîş.

 

Koordînatora Mudirîya Polîtîkayê Cinîyan ê Şaredarîya Peyasî, Gunay Yakut raporê hîrê aşman ê kampanyaye ercna.

 

Bi na kampanyaye hemverê problemê cinîyan polîtîkayî yenê averberdiş

 

Gunay Yakut da zanayîş ke semedê wareyê ke rêxistin û paştdayîşê cinîyan xurt benê awan bikerê û hemverê şîdetî kewtê rayîr û wina vat: “Îdarekarîya herêmî de wareyêk ke cinî muracat bikerê nêmendibî. Na kampanya tena Amed de nê, herêma Serhed, Botan û pêro Tirkîya de yena kerdiş. Çi heyf tayînkerdişê qeyûman hema dewam keno û ma zî xebatanê xo bêmabên dewam kenê. Ma her roje kampanya pîl kenê û xebatanê xo dewam kenê. Na  kampanya semedê averberdişê mekanîzmayê têkoşînî yê hemverê şîdet û semedê averşîyayîşê polîtîkayê hemverê şîdetî, semedê têduştîya cinsî ya komelî ke xebatî bêrê kerdiş, ame destpêkerdiş. Ma nê hîrê aşman de dewan, taxan, AVM, bazar û xeylêk wareyan de xebatan kerd. Ma xeylêk wareyan de xebatanê atolyeye kerdî.”

 

Atolyeyê tewir bi tewir ameyî kerdiş

 

Gunay Yakut dewam de wina vat: “Ma atolyeyan de têduştîya komelî ser o, şîdetê cinîyan ser o, tewirê şîdetî, têkoşînê hemverê nînan û caardişê qanûnê 6284 xebatan kerd. Eynî wextî de ma atolyeya cuyêka bêşîdet pê ard. Ma atolyeyê pawitişê cewherî pê ard. Ancî roja ewro de şîdetê dîjîtal zêde beno. Ma derheqê nê de kampanya dayî destpêkerdiş. Ma xo resna 15 hezar cinî. 3 aşman de hema hema pêro qezayan de merkezê paştdayîşî kewtî cuye. Xeylêk merkezî amebî padayîş, newe ra ameyî akerdiş û muracatê cinîyan ame girewtiş.”

 

Cinî bi ruhê 8ê Adarê meydanan de yê

 

Gunay Yakut dîyar kerd ke do bi ruhê 8ê Adare dewan, taxan de xebatan bikerê û cinîyan dir bêrê têhet û wina vat: “Eynî wextî de awankerdişê pawitişê cewherî lingêke kampanyaya ma ya. Ma eynî wextî de bingehê medyaya dîjîtale awan bikerê. Semedo ke ma zanê xeylêk kesî medyaya dîjîtale şuxilnenê û bi taybetî cinîyê ciwanî zaf şuxilnenê. Ma do bi nê metodî xo biresnê cinîyan û pîya 8ê Adare de meydanan de bê.”