Nazlican Nujîn Yildiz

 

ÎZMÎR - Dayîka Aştîye Peyruze Kurt da zanayîş ke ê do heta peynîye paştdayîş bidê venga ‘Aştî û Komelê Demokratîkî’ yê Rayberê Şarê Kurdî Abdullah Ocalanî û vat, semedê aştî pê bêro ganî her kes berpirsyarîyê xo ca bîyaro.

 

Rayberê Şarê Kurdî Abdullah Ocalanî 27ê Sibate de heyetê Îmraliyî yê Partîya Têduştî û Demokrasî (DEM Partî) dir pêvînayîş kerd û mesajê ‘Aştî û Komelê Demokratîkî’ neql kerd. Badê deklerekerdişê mesajî her cayî ra paştdayîş ame û her ke şino no paştdayîş zêde beno.

 

Endama Înîsîyatîfê Dayîkê Aştîye Peyruze Kurt derheqê vengdayîşî de qisey kerd û da zanayîş ke do heta peynî paştdayîş bidê vengdayîşî û ganî her kes berpirsyarîyê xo ca bîyaro. Peyruze Kurt bale ant adirbesto ke PKK’yî îlan kerdo ser û vat ganî cewabê na game bêro dayîş.

 

Çi destê ma ra bêro ma do bikerê

 

Peyruze Kurt qiseykerdişê xo de da zanayîş ke ê heta peynî paştdayîş danê vengdayîşê Rayberê Şarê Kurdî Abdullah Ocalanî û wina vat: “Ma semedê aştîye amade yê. Çi destê ma ra bêro ganî ma bikerê. Bi serran o ma paweyê na roje yê. Bi serran o ma semedê aştî têkoşîn kenê. Ciwanê ma merdî, tutê ma vînî bî, gorê înan çin ê. Ma hêvîdar ê ke na gonî êdî vindero. Ma hêvîdar ê ke dayîkê tirkî zî kîşte ma de ca bigîrê. Wa vera çekan, teyareyê şerî, vilî abikerê. Wa her kes bireso tutanê xo.”

 

‘Ganî yew het nêbo’

 

Peyruze Kurt derheqê îlankerdişê adirbestî de qisey kerd û wina domna: “Ganî cewabê na game bibo. Ganî yew het nêbo. Kezeba ma veşaya. Şer beno sebebê her çî. Zirar dano her kesî. Dayîkî bîyayîşê xo yê tewr bierc vînî kerdî. La wa êdî dayîkî mebermê. Wa no şer vindero, çi hewce bikero ma do bikerê. Ma nêwazenê bimirê, ma wazenê biciwîyê. Ma wazenê sey şarê pêro dinya azad biciwîyê.”

 

‘Ma aştîyêke bi rumet wazenê’

 

Peyruze Kurt tewr wina vat: “Wa yewîye, têduştî û aştî pê bêro. Ma nika wazenê vera ke ma tabût ko bikerê, esteyan bigêrê, gulan biçînê. Vera ke ma tabût ko bikerê, ma wazenê tutanê xo ko bikerê. Ma  êdî şer û cenazeyan nêwazenê. Ma aştî wazenê, aştîyêke mende wazenê, aştîyêke bi rûmet wazenê. Wa na aşitî mende ba ke ma vajê ke ma nika dinya de yê. Bi serran o ma bermenê, ma êdî nêwazenê bibermê. Ma wazenê biciwîyê û bihuyê.”