MERKEZÊ XEBERAN - Kongra Star derheqê qerarê cezaya dardekerdişî ya hemverê Pexşan Ezîzî û Werîşe Mûradî eşkerayîye da û venga rêxistinê mîyanneteweyî kerd ke hemverê na ceza de wurzê. 

 

Kongra Starî ya kantonê Firatî derheqê qerarê cezaya dardekerdişî ya hemverê çalakîkeranê kurdan Pexşan Ezîzî û Werîşe Mûradî eşkerayîyêke dayî. 

 

Eşkerayîye Meydanê Jina Azad a Kobanê de hetê endama Kongra Star Meysûn Kawar ra amî wendiş.

 

Eşkerayîye de ame vatiş: "Vernîya çend rojan Dadgeha Berzî ya Îranî qerarêk da; qerarê dardekerdişî yê hemverê her di çalakîkerê kurdan Pexşan Ezîzî û Werîşe Mûradî, bi sûcdarîya serewedaritişê çekdarî yê hemverê dewlete û girêdayîşî komê hemverî dir, her di çalakîkerê kurdî raştê îşkenceyê fîzîkî û psîkolojî ameyî. Sewbîna serdayîşê keyeyê înan zî qedexe kerdî û destûr nêdayî ke înan rê avûkatêk bêro girewtiş ke înan bipawo.

 

Seke yeno zanayîş Pexşane sey çalakîkera komelê Vakur û Rojhelatê Sûrîye de kar kerdêne û paştdayîşê kênayê ke DAÎŞ’î ra ameyîne xelaskerdiş, kerdêne. Werîşe zî sey çalakîkera ke xoverdayîşê Kobanê de cayê xo girewtebî, hemverê terorê DAÎŞ’î xoverdayîşêk bêhempa kerdêne."

 

Kongra Star eşkerayîya xo de cezaya dardekerdişî şermezar kerd û venga pêro rêxistinê mîyanneteweyî, rêxistinê heqê merdiman û komelê mîyanneteweyî kerd ke destwerdan bikerê û cezaya dardekerdişî betal bikerê.