STENBOL - Newroza Stenbolî ke bi mîlyonan kesî tewr bîyî, wayîrvejîyayîşê vengdayîşê seserre yê Abdullah Ocalanî ame kerdiş. Hemsereka DEM Partî ya Stenbolî Arîfe Çinar dîyar kerd ke do coşê Newroze berê her hetî û vat, do sîyasetê aştî û demokrasî pîl bikerê.

 

23yê Adare de bi sloganê ‘Rayberîya Azad Komelê Demokratîkî’ û ‘Semedê azadîye komelê demokratîkî’ Stenbol de Meydanê Yenîkapi de pîrozbayîyê Newroze ke nêzdîyê mîlyonêk kesî tewr bî, ame organîzekerdiş. Şar wayîrê vengdayîşê seserre yê Rayberê Şarê Kurdî Abdullah Ocalanî vejîya û adirê Newroze berz kerdî. 

 

Hemsereka Partîya Têduştî û Demokrasî (DEM Partî) ya Stenbolî Arîfe Çinar derheqê tabloyê Newroze de vejîyayo werte, qisey kerd.

 

‘Newroza goreyê ruhê demê neweyî’

 

Arîfe Çinar dîyar kerd ke Newroza 2025ine xebatêke xurt kerdê û xeylêk qezayanê Stenbolî de adirê Newroze berz kerdê. Arîfe Çinar wina vat: “Bi vengdayîşê seserre yê Birêz Ocalanî tewrbîyayîşê Newroze zaf pîl bî. Ma nê pawitêne. Semedo ke vengdayîş hêvîyêke pîl da şarî. Nêzdîyê mîlyonêk kes tewr bî. Newroza Stenbolî goreyê ruhê demê neweyî bî. Qiseykerdişan de mesajî ameyî dayîş. Semedê şert û mercê cuyêka têduşt û azade, ame vatiş ke ganî sewîyeya desturê bingehîn de têduştî pê bêro. Vengdayîşê 27ê Sibate dir têgêrayîşê azadîya kurde gamêke eşt. La dewlete game nêeşta. Rojava de 7 kesî bi teyareyê Tirkîya ameyî qetilkerdiş. Ganî dewlete lezkî gaman bierzo.”

 

Dorê adirê Newroze de bî yew

 

Arîfe Çinar dewam de wina erjnayîş kerd: “Her tim dewlete barîyeran dana ro la şarê kurdî xira keno û Newreoze pîroz keno. Newroze vengê hempar ya berz bena ya. Nê semedî ra her tim Newrozan hedef gênê. Pêwa her çî bi serran o adirê Newroze yeno gurkerdiş û resayo mîlyonan. Vengdayîşê Birêz Ocalanî bî hêvî. Ma semedê aştîyêke bi rumet, cuyêka bi rumet dorê adirê Newroze de benê yew.”

 

Arîfe Çinar qiseykerdişê xo wina qedêna: “Zemînê têkoşînê hempar hedef yeno girewtiş. Mesajê Ozgur Ozelî ke şirawit Newroze zî erjaye bi. Semedê têkoşînê yewbîyaye û demokrasî wezîfe keweno milê ma hemîne ser. Bi yewîya şaran, vurnayîşî do pê bêrê. Ma prosesêk muhîm ra derbaz benê. Heta aştîyêke bi rumet nêro zergûnkerdiş, derbazbîyayîşê demokrasî zî mumkin nîyo.”