Şehrîban Aslan

 

AMED - Derheqê rayîrşîyayîşo ke 1-4ê nîsane Amara de bêro organîzekerdiş, endama Meclîsê Ciwananê DEM Partîye Sûltan Yorulmaz vengdayîşê tewrbîyayîşê rayîrşîyayîşî kerd û va, "Ciwanî do ver bi azadî û roje de rayîr ra şêrê."

 

Meclîsê Ciwananê Partîya Têduştî û Demokrasî (DEM Partiyê) do mabêne 1-4ê nîsane de Amed de ver bi Amarayê qezeya Xelfetî ya Rihayî de bi sloganê, "Ma bi komelê demokratîkî ver bi azadîye rayîr ra şinê" şêrê. Meclîsê Ciwanan xebatê xo yê rayîrşîyayîşî ser o dewam kenê, endama Meclîsê Ciwanan Sultan Yorulmaz derheqê muhtewayê rayîrşîyayîşî de agahî da.

 

'Pêro dinya bî şahidê kokerdişê vengdayîşî'

 

Sultan Yorulmaz, dîyar kerd ke her çî bi vengdayîşê Rayberê Şarê Kurdî Abdullah Ocalanî yê 27ê Sibate de dest pêkerd û va, "Mîyanê şarî de moral, coş û hêvîyêke pîl est bî. Hêvîyêke pîl yê Girawa Îmraliyî ameyîne. Semedê pêro şarê ke binê îqtîdarê kolonyalîzmî de bî, bî hêvîyêke. Kuçeyan, keyeyan, taxan, dewî û metropolan de badê vengdayîşî heta ewro vejîyayî kuçeyan. Eynî wextî de cinîyê ke kewtî kuçeyan vengê xo berz kerdî. No vengdayîş moralêk pîl da ma ciwanan. Bi nê kokerdişî adirê Newroze herikya wareyan û bi ruhê Rahşan û Mazlûm Dogan adirê Newroze geş bî."

 

'Ma do bi serkewtişî tacîdar bikerê'

 

Sultan Yorulmaz, serra 2009ine û nata rayîrşîyayîşêk wina nêkerdê û va, bi vatişê Rayberê Şarê Kurdî Abdullah Ocalanî; "Ma bi ciwanî dest pêkerd, ma do bi ciwanî biqedênê" anê ziwan. Sultan Yorulmaz va: “Pêwa ke mîyanê ciwanan de wayîrvejîyayîşêk wina est o, girewtişê qerarê rayîrşîyayîşî hende zehmet nêbî. Rol û mîsyonê cinîyê ciwanan yê nê prosesî de  vengdayîşê Rayberê Şarê Kurdî Abdullah Ocalanî ser o xeylêk muhîm o. Bi hawayêk cidî prosesêk xeylêk hesas de yê ke ma xo prosesî bînan ra berpirsîyar bivînê. Badê vengdayîşê Rayberê Şarê Kurdî coş û moralê şarî xeylêk berz bî û berpirsiyarîyê ma yê ke ma bi rayîrşîyayîşêk tacîdar bikerê."

 

Semedê Amara vengdayîş 

 

Sultan Yorulmaz dîyar kerd ke ê bi ruhê Mustafa Dag û Mahsum Karaoglan yê serra 2009ine de Amara de ameyî qetilkerdiş, rayîr ra şêrê û va: "1ê nîsane de meydanê Şêx Seîdî yê Amedî de ma do rayîr ra şêrê û roja diyîne de ma do ver bi Amara rayîr ra şêrê. Ma wazenê xo nê berpirsyarî de hîs bikerê, bi hêvîye ver bi Amara rayîr ra şêrê û sey ke serkewtiş bi dest bikerê. Wexto ke ma resayî Amara ma wazenê her kes bi nê ruhî, heyecan û hêvîye tewrê rayîr ra şîyayîşî bibo.”